Сарул гермўд тосхнав, Санамр імтн амрг

Љил болєн август сарин хойрдгч нарн ґдр мана орн-нутгт тосхачин Ґдр темдглгдні. Сін ґдр угтљ, байрин керг-ўўлдврмўд бўрдігдљ, тосхлтд кґдлљіх улсиг болн эн халхин ветеранмудыг мадн йґрінівидн. Эндр Элстд бас тосхачин ґдрт нерідгдсн байрин хург болх. Энўнд кўч-кґлсірн ончрсн кґдлічнриг йґріљ, ачлврмуд бірўлљ ґгх. Тедн дунд «АлексСтрой» ООО-н модна урч А.Джембушевиг Хальмг Тањєчин правительствин Кўндллєні єашгар ачлхмн.

Аркадий Джембушев бає цагас авн тосхлтын халхд кґдлљіні. 1990-ч љилмўдин эклцір «ПМК-1» тосхлтын организацд кўч-кґлсні хаалєан эклсн билі. Дарунь «Строитель» тосхлтын фирмд кґдлмшт орад, энд арвн љилдін кґдлв. 2003 љилд «АлексСтрой» ООО бўрдігдсмн. Эн тосхлтын организац ўўлдсні тўрўн ґдріс авн Аркадий Андреевич кґдлљіні.

Аркадий Джембушев тосхлтын объектд хамдан кґдлљісн ширдіч Галина Андреевнала таньлдљ, седклнь тусљ, эдн ханьцсмн. Ода эдн хоюрн «АлексСтрой» ООО-д кґдлљіні. Залу гергн хойр ниитієір бііљ, нег-негін кўндлљ, гертін болн кґдлмштін чигн оньдин хамдан, кезід чигн нег-негнісн салхш. Аркадий болн Галина Джембушевихн єурвн ўрін ґскљ-босхад, љирєлин сарул хаалєд орулв. Ууєн кґвўнь Павел бас тосхлтын халхд электрик болљ кґдлљіні. Людмила кўўкнь инженер-тосхачин эрдм дасв, бас эк-эцкин ўлгўрір гермўд тосхлєна кергт орлцхнь лавта. Отхн кўўкнь Ангелина юристин эрдмті.

Аркадий болн Галина Джембушевихн кўч-кґлсч коллективдін тоомср олсн бііні. Галина Андреевна уйн наснасн авн ширдіч болљ тосхлтд кґдлв. Ґдгі цагт ширдічнрин бригад толєалљ, хамдан кґдлдг улстан ўлгўр-ўзмљ болна. Аркадий Андреевич тањєчд кесг чинрті объектс тосхлєнд орлцсн кўн мґн. Урднь «Строитель» фирмд кґдлљісн цагтан Элстд Пенсионн сањгин шин гериг бас тосхла. Тер мет «АлексСтрой» ООО тањєчд олн социальн объектсин тосхлтын болн ясврин кґдлмшт шунљ орлцсмн. Хар Єазра района Комсомольск селінд района больницд болн бичкдўдин ўўділтин Біішњд капитальн ясвр кесмн. Тер мет Сарпан района Садовое селінд поликлиникиг болн бичкдўдин больнициг ясљ шинрўлсмн. Элстд Деед зарєин ўзмљті гериг тосхљ, эдлврт орулсмн. Дікід болхла Аркадий Андреевич хамдан кґдлдг улстаєан Комсомольск селінд хурл тосхљ, буй хоршаљ, ірўн керг бўтісмн.

Сўл љилмўдин эргцд мана тањєчд социальн гер-бўўр икір тосхгдљана. Імтиг хуучн, эвдрсн гермўдіс нўўлєлєні программ кўцілєні йовудт «АлексСтрой» ООО Элстд 3-ч, 2 микрорайодт гермўд тосхсн билі. Эн љил Калачинская уульнцд 108 патьрта олн давхр герин нег корпусиг тосхад эдлврт орулсн билі. Дікід болхла Ипподромн уульнцд ґнчір ґссн улсин тґлі тўрўн гер тосхгдв. Ода эн тосхлтын организац балєсна 4-ч микрорайонд МВД-н кґдлічнрин тґлі олн давхр гер, Ипподромн уульнцд 25 патьрта гер тосхљана.

Модна урч Аркадий Джембушев гермўд тосхлєна кергт шунљ орлцна. Йир даавртаєар, дигті-тагтаєар, седклін тівљ, ґґдін чинртієір кґдлмшін кўціні. Аркадий Андреевич цґн ўгті, єольшг, сін зањта, тогтун кўн болдг тґліднь хамдан кґдлдг імтн энўг кўндлні. «Урна урл тоста» гидг хальмг кезіњк ўлгўр біідг биший. Тўўшњ єартан урн Аркадий Джембушев арє-чидлін ірвллго кўч-кґлсін єарєљ, ґрк-бўлін асрљ, біідл-љирєлинь ясрулљ, амулњ менд, сін-сііхн бііні, ўзмљті кґдлмшірн олн дунд тоомср эзлљіні. Энўні тосхсн гермўднь тањєчин хотл балєсиг болн селідиг кеерўлні. Балєсар йовљ йовад тосхсн ке-сііхн гермўдін ўзхлі, тосхачнрин седклнь байрар дўўрні.