Дала ламин шин дегтр

«Сохраним Тибет» гидг сањ Дала ламин шин дегтр барас єарєв. «Мое путешествие в мир духовных традиций. Об основополагающем родстве вероисповеданий» гиљ тер дегтр нерідгдні.

Дала ламин гегіні шин дегтриг умшхд йир соньн болн сурємљин чинрті. Кўњкл Багшин єардврт шаљна авъясмудла таньлдад, тедн хоорнд уњ-утхарн ґґрхн тоот олн бііхиг медљ болхмн. Шаљн болєн эврі ончта болдгнь темдгті. Болв чигн тедниг залєљах тоотнь чигн бііні. Буддистнрин Ик Багш терўгинь зааљ ўзўлљіні. Імтиг соньмсулдг иљл тґрмўд бііні. Цуг терўнднь ціілєвр ґгхір шаљн болєн зўткні. Ґдр болєн імтні оньгт бііх тґрмўдин учринь медўлхин тґлі шаљн болєн цаєан седклті болдгиг, ґґр бііх улслаєан седклін медлцљ, эвір біідгиг, кен-негндін дґњ болљ, ґр-ґвч седклті болдгиг шаљн болєн сурємљлна. Юњгад гихлі, кен чигн кўн ямаран шаљнд иткнў, чирі-зўснь оњгдан болну, тґрўц талдан хіліцті болн зањ-авцта болну йилєл уга цугтан хґв-кишгті бііхір, ўрдўдтін чик сурємљ ґгхір, эрўл-менд бііхір зўткні. Шаљн болєнд імтні амулњ-менд бііхин тґлі ном умшгдна, мґргўл кегдні. Кўн болєна љирєл хґвті болсн деерін ухан-тоолврта болн сін ашта болхднь туслхар бурхн-шаљн ўўлдврін зґрўлні.

Шаљн болєна эн зґрўллтиг медљ авхларн імтн шаљна олн-зўсн авъясмудыг чигн медљ, эврі кўўні угаг чикір ўнлљ чадхмн болљана. Дала ламин тоолврар, тер цагт імтн шаљна халхар хоорндан йилєрлго, ни-эвір бііх билі. Эн єол ашлвриг медљ авхин кергт тер эс гиљ эн шаљнд шўтід керг уга, моєлцг єазр деер бііх улсин ухан-седкл ідл болљахинь, єоллгчдан імтн тґвкнўн љирєлір бііхір седљіхинь медх кергті. Ґдгі цага делкід юн эс учрна. Олн йовдлмудын учр-утхинь медљ авхин кергт, ямаран чигн кўнд біідлд ухаєан геелго бііхин тґлі Дала ламин шин дегтриг оньган ґгч, болєамљтаєар умшх кергті. Иргчин туск иткмљті Дала ламин хіліциг чигн дегтр умшљ медљ болхмн. Оюни ик чинрті эн дегтриг дегтрин магазидт болн интернет-магазина дґњгір авч болхмн.