Арєлачд нґкд болх

Одахн Хальмг Тањєчд арєлачнрин зґв харсдг дааврта элч Вадим Дарбаков кґдлмшч кергір Лаганя районур одв. Красинск селіні Л.И. Манджиевин нерті дундын школд одљ, сурєульчнриг болн багшнриг медрлин Ґдрлі йґріљ, шин сурєулин љил соньн, кўцімљті, олн байрта йовдлмудар байн болхиг, цуєар шин диилврмўд бірхиг дурдв.

Школд байрин керг-ўўлдврт орлцсна хґґн Вадим Дарбаков Лаганя районд дааврта элчин олна нґкд Татьяна Шонхоровала хамдан арєлачнрла харєљ, сўв-селвг болн ціілєвр ґгч, дґњ болв.

Келхд, арєлач Эренцен Марзаев гер-бўўр тосхлєна тґлі хулсар панельмўд болн блокмуд кељ єарєна. Эврі кергін, производстван ґргљўлхин тґлід банкас ґгйієір мґњг авхар седв. Болв хойр банк энўнд мґњг ґгх зґвшіл ґгсн уга. Эренцен Борисович урднь банксас авсн мґњгні ґрін цаглань ґгдг біісмн, тер бийнь банкс энўнд мґњг ґгсн уга. Энўні келсір, зуг банкас мґњг ґгйілљ авад, производстван ґргўлљ болхмн. Тегід ода производстван цааранднь делгрўлх арє уга болљана гив. Дааврта элч арєлачла кўўндід, ґґрхн иргчд банкас мґњг ґгйієір авхднь дґњгін кўргх болв.