Мана герин байр

Элст балєсна 8-ч микрорайонд біідг 34-ч тойгта мана гер 1984 љилин апрель сард эдлврт орулгдла. Эн хаврар бидн гер тосхгдсна 30-љилин ґґнд нерідід, субботник бўрділівидн. Цуєар олна кґдлмшт шунмєаєар орлцв. Ик-бає уга герин хаша-хаациг хог-богас цеврлљ, цевр-цер біідл тогтав. Імтн суудг хуучн скамейкс ширдљ, модд суулєљ, цецгўд тірљ, эргндк єазран кеерўлвидн.

Одахн 8-ч микрорайона байрла ирлцўлід, бидн гериннь байран темдглвидн. Тер ґдр кееєі хувцан ґмссн, байрта-бахта седкл зўўсн бґдўн улс, бичкдўд чигн гериннь єаза цуглрв. Мана байрт «Восток-сервис» ОАО-н элчнр орлцљ, цуглрсн улсиг йґріљ, герин хўўвин гешўдин шунмєа ўўлдвриг темдглљ, ачлврмуд болн ўнті белгўд бірўлљ ґгв. Герин хўўвд подъезд болєнас нег кўн орна, энўг Надежда Вячеславовна Аляшева толєалљана.

Мана гериг шинкін элврт орулсн цагт ик зуудан энд тосхлтын халхд кґдлљ йовсн улс патьр авсмн. Тегід урднь энўг тосхачнрин гер гиљ неріддг билі. Энд кўч-кґлсірн ончрсн эрдмчнр бає биш бііні, тедн дунд Кўч-кґлсні Улан Тугин орденір ачлгдсн Валентина Ивановна Мангутова, Хальмг Тањєчин ачта тосхач Алексей Дюдеевич Мангутов йовна.

Тер ґдр бидн гериннь ончта ґґниг темдглљ, тоовр кељ, дуд дуулљ, би биилљ, сіінір ніірлвидн. Хоорндан ґґрхн таньлдљ, ниитієір біілєні залєлдаг улм батрулвидн. Бичкдўдин дунд шўлгўд умшлєна, зург зурлєна, нань чигн марєас бўрдіљ, билгірн ончрсн кўўкдт белгўд ґгвидн. Кўўкд-кґвўдиг імтіхн хотар, зер-земшір бас тооввидн. Герин байр цугтаднь уданд тодлгдхнь лавта.