Сіінір амрч, эрўл-мендін батрулв

Эн зунар мана тањєчин олн бичкдўд Крымд амрв. Тенд август сарин чилгчіс авн сентябрь сарин эклц кўртл бичкдўдин амрлєна санаторьт сўл селгінд амрсн кўўкд-кґвўд одахн хірљ ирв.

Хальмгин сурєуль-эрдмин халхин дамшлтта кґдлічнр бичкдўдиг дахљ йовад, тедниг хіліљ, килмљін ґгч біісмн. Хар Єазра района Ачнр селіні дундын школын багш Анна Лиджиева бас сурємљлач болљ ўўлдсмн. Анна Хулхачиевнан келсір, сўл селгінд билгті, шунмєа бичкдўд, олн ўрті болн бає теткврті ґрк-бўлмўдин кўўкд амрцхав. Урљ ґдр тањєчин социальн делгрлтин, кўч-кґлсні болн імтиг кґдлмшір тетклєні министр Марина Ользятиева эднлі харєв. Сурємљлачар кґдлљ йовсн Анна Лиджиева болн энўні хіліврт біісн багин кўўкд-кґвўд Крымд амрсн тґлідін тањєчин єардврт, министр Марина Ользятиевад ханлтан ґргв. Эдн яєљ амрснаннь тускар келљ ґгід, Крымас авч ирсн белгўдін белглв. Санаторьт эдні тґлі сін таал тогтагдљ, ґдр болєн соньн керг-ўўлдврмўд, марєас, экскурсьмуд бўрдігдсмн. Эдн Севастополь, Бахчисарай болн Ялта орљ, кецў сііхн, єііхмљті, ончта ормс ўзљ, эн єазрин соньн тууљ медљ авв. Тер мет цегіхн уста тењгс йир таасгдв, эдн ґдр болєн ґґмдг билі. Тегід кўўкд сіінір амрч, эрўл-мендін батрулсн деерін єііхмљті єазр єііхљ, соньн тоот медљ авв. Анна Хулхачиевнан келсір, біірн імтн Хальмгас ирсн бичкдўдиг болн бґдўн улсиг чигн ўр-иньгинір, байртаєар тосч, тўрў цагт мана тањєчин олн імтн эднд ик дґњ-тусан кўргснднь ханлттаєан медўлв.

- Кўўкдт амрлєн таасгдсн учрар байрлљанав. Тањєчин єардвр, мана министерств арє-чидлін єарєљ, бичкдўдин амрлє Крымд бўрдіснь сін ашта болснь маднд урмд ґгчіні. Кўўкд-кґвўд Хальмгин элчнр болљ, бийін сін таласнь ўзўлснь айта. Кўўкд Крымин санаторьт олна керг-ўўлдврмўдт, марєаст шунљ орлцљ, ончрљ, кесг ачлврмуд авч ирв. Иргчдін чигн бидн тањєчин бичкдўдиг тиигірін амрлєнд йовулхвидн, - гиљ Марина Ользятиева темдглв.