Ик чинрті болн баєчудт туста зірлг

Евдокия ХАБУНОВА,
КалмГУ-н хальмг филологин болн дорд ўзгин ном шинљллєні институтын директор, филолог номин доктор:

- Мана институтын багшнр, оютнр, кґдлічнр «Хальмг ўннд» барлгдсн Хальмг Тањєчин Толєач Алексей Маратович Орловин «Хальмг кел ірўнір хадєллєна болн делгрўллєні халхар государственн дґњнлєні керг-ўўлдврмўдин тускар» гидг зірлг умшад, икір байрлвидн. Хальмг келні тґриг мел сергієід, чинринь ґґдлўлід бііхлі, энтн кезідчн мартгдшго гиљ санљанав.

Хальмг кел дасчах сурєульчнр тґр-йос єардљах улсас, ах ўйнріс сін ўлгўр авад, тґрскн келін улм сіінір медхин тґлі мана институтд ирід, эн эрдмір сіінір сурад, дґрвн љилин туршарт сар болєн 5000 арслњга дем авхла, энтн эднд урмд немхнь лавта гиљ санљанав.

Институт тґгсієід, школд кґдлљ, бичкдўдт хальмг кел зааљ йовх мана бає наста багшнриг эн сін зірлг бас байрлулх, эдн хальмг келін цааранднь делгрўлхір зўткх гиљ ніілљінів.

Жанна ЭРДНЕЕВА,
Элстин техническ лицейин хальмг келні багш:

Эн љил би хальмг филологин болн дорд ўзгин ном шинљллєні институт тґгсієід, Элстин техническ лицейд багшлљанав. Институтд тавн љилин эргцд хальмг келні болн литературин халхар авсн медрлін сурєульчнрт шињгіхір зўткљінів. Хальмг Тањєчин Толєач Алексей Маратович Орловин єарєсн шишлњ зірлг ик чинрті болн хальмг келні баахн багшнрт ик туста гиљ тоолљанав. Тегід тањєчин єардачд ик ханлтан ґргљінів, кељ-кўціљіх ўўлдврнь дањгин кўцімљті болтха!

Ах сурєульд орсн саамд би тґрскн келін сіінір меддго билів. Байн дамшлтта, ґґдін мергљлтті, цаєан седклті багшнрин дґњгір би хальмг келін сіінір дасч авув. Мана институтд сіінір сурдг, олна кергт шунљ орлцдг оютнриг дањгин дґњнід, ґґдін стипендь ґгні, мґрієір ачлна. Тегід чигн оютнр сурєулян улм сіінір сурхар седні. Оютнр єазадын орн-нутгудт (Моњєлд, Китдт) келні халхар дамшлт авна.

Мана институтын оютнр йир нииті бііні. Багшнр эднд ик килмљін ґгні. Би ода чигн институтын єардврт, багшнрт ик ханлтта біінів. Баєчуд, институтд ирљ тґрскн келін дастн! Тањєчин єардвр тадниг дґњнљіні.