Сүл хоңхин байр түрүн болҗ онлайнд болв

26-05-2020, 10:13 | Таңһчин зәңгс » Сурєуль-эрдм

Сүл хоңхин байр түрүн болҗ учрснас авн далн хойр җил болв. Тер цагас авн мана орн-нутгин дунд сурһульмудт энүг җил болһн темдгләд бәәнә. Хәрн, эн җилд Сүл хоңхин байр йирин биш, өвәрцтә болҗ һарла. Учрнь юундв гихлә, ковид гидг гем икәр тархсн болад, көл-хөрән (карантин) зарлгдад, олн зүүлин бүрдәцс, тер тоод сурһулин бүрдәцс чигн, онлайн-җурмар көдлдг болв. Тегәд чигн сүл әңгин сурһульчнр нег һазрт олар цуглрх арһ уга болцхав. Гив чигн әмдрлин хаалһд иим сәәхн учрта, ончта байриг эс угтхла басл сән биш болдм. Тегәд Әрәсән Холвана Гегәрлтин яамын (министерствин) алвна (официальн) сайт деер өцклдүр “Сүл хоңх – 2020” нерәдлһтә Цугәрәсән хүвцән давулгдсмн. Хүвцәнә йовудт олн соньн керг-үүлдвр, тер мет Әрәсән йилһән сән багшнрин болн регионмудын элчнрин шуд эфирмүд, соньн гиичнрлә күүндврмүд болн нань чигн олн юмн давулгдсн билә. Багшнр, гиичнр чигн сурһулян төгсәҗәһә баһчудыг йөрәҗ, эврә сурһуль сурсн цагин туск тодлврарн хувалцсмн.
Керг-үүлдвриг Әрәсән Гегәрлтин яам “Mail.ru Group”, Олн улсин оютнрин эвлл (ассоциац) болн Әрәсән сурһульчнрин көдлһән гидг бүрдәцслә хамдан давулсмн. Нег һазрт цуглрад улан чирәһәрн харһҗ ядсн болснас нань юмн Сүл хоңхин байрин йосар болв. Көвүд-күүкд сурһульчин хувцта, “Выпускник” гидг тасмта орлцла.
Эн җил Хальмг Таңһчд һурвн миңһ шаху күн дунд сурһулян төгсәв. Эдн чигн Цугәрәсән хүвцәнд орлцсмн. Зуг, Хальмгин сурһульчнр эврә флешмобан бас давулцхав. Һартан хоңх бәрҗ җиңнүлсән видеобичлгт татч авад, интернетд орулцхав. Дарунь эн олн видеобичлгиг ниилүләд, нег үзллт (видео) болһҗ кесмн. Эн флешмобднь Хальмг Таңһчин Толһач Хасгин Бату чигн орлцсмн. “Тан өмнк әмдрлин хаалһд олн сәәхн йовдл учрх мөн. Эн хаалһиг Хальмг ик сурһульд орснас авн эклхитн күсчәнәв, зуг талдан һазрт одад сурх болв чигн, мана таңһчин сән элч болад, күцәмҗтәһәр йовҗ ирәд, Хальмгин төлә көдлхт гиҗ нәәлҗәнәв, - гиҗ Таңһчин Толһач Хальмг дунд сурһульмудыг төгсәһәчнрт цаһан хаалһиг дурдҗ.
Немәд келхд, үдин хөөн сүл әңгин зәрм сурһульчнр һаза һарлдад, уульцнар бийән сергәҗ йовад, зург цокад байран давулцхав. Гив чигн хойрас үлү күн харһад йовлдсн уга. Бидн эврә газетын нерн деерәс цуг эднд ямаран чигн кергтнь күцәмҗтә болхиг дурдҗанавидн.

МАНҖИН Санл

#ПрощайШкола #ПоследнийЗвонок #Стопкоронавирус08 #ОставайсяДома #МыОстаемсяДома

Видео