Түрүн шүүврән арвтнр өгв

09-07-2020, 11:24 | Таңһчин зәңгс » Сурєуль-эрдм

Давсн долан хонгин басң өдрлә, така (июль) сарин 3-ла әрәсән, тер тоод мана таңһчин школан төгсәҗәх сурһульчнр түрүн ЕГЭ шүүврән өгв. Эдн географин, литературин, информатикин халхар хоршасн медрлән сөрв.
Ут турштан Элстин болн райодын 371 арвт ЕГЭ өглһнә керг-үүлдврт орлцв. Эднә өгсн шүүврин ашнь кирцхд така сарин 17 күртл медгдх. Роспотребнадзорин тәвсн цуг неквр эн саамд күцәгдв. Шүүвр өгдг пунктст цуг хорас шишлң кевәр цеврлгдв болн түгдг гемәс сагллһна нань чигн цуг керг-үүлдвр күцәгдв гиҗ пунктсин һардачнр тоолвран келв.
Цуг Әрәсәһәр 714 миңһн арвт, тер тоод эн җил школан төгсәсн 620 миңһн уйн настнр ЕГЭ шүүврән өгв. Эднә төлә орн-нутгар 5728 пункт белдгдв. 12 миңһн медицинск көдләч төгсәһәчнрин эрүл-мендинь бүрткнә.
Така сарин 3-д Әрәсән гегән-герлин министр Сергей Кравцов Алтайск крайин Белокурихин 1-ч тойгта СОШ-т болн Алтай Республикин хотл Горно-Алтайск балһсна В. К. Плакасин нертә гимназьд одад ирв. Шүүврт белдлһнә Роспотребнадзорин болн министерствин эпидемиологин неквр яһҗ күцәгдснә туст эн хамгин түрүнд бүртклһ кев. «Бидн регионмудыг хоорнднь ЕГЭ-н ашар дүңцүлҗәхшвидн, хамгин түрүнд эн шүүвр үнн-чик бәәдлин, әдл некврин болн әдл үнллһнә таалд бүрдәгдх зөвтә. Давсн җилин ашар цуг эн тоотыг Алтай Республик йилһән сәәнәр күцәв»,- гиҗ министр темдглв.
Ода Алтайд ЕГЭ өгдг 14 пункт болн 114 классин хора бәәнә. Аһариг гем түгдг тоотас цеврлдг оборудовань углҗ тәвгдсмн. Багшнриг белддг орн-нутгин вузмудын оютнр олна бүрткәчнр болҗ пунктст эс гиҗ шүүврин мониторингин төвдт эн дааврта керг-үүлдврт орлцна, тиим көдлмш эднә багшин дамшлт болҗ үнлгднә. Тер тоод мана Хальмг ах сурһулин оютнр тиим үнтә дамшлт бас хоршана.

ҖААХАН Бадм

Видео