Суврһ босхҗана

14-08-2020, 16:23 | Таңһчин зәңгс » Бурхн-шаҗна төрәр

2014 җилд соньн зәңг һарла. Көтчнрә района Шатта селәнә өөр бәәрн әмтн һазр дорас бурхд болн шаҗна нань чигн әрүн тоот олҗ авсн йовдл цугтад темдгтә болв. Тиигхд селәнә әмтн Гегәрлтин Суврһ тосххар шиидсмн. Зуг олн зүсн учрар тосхлт хооран саагдад бәәв.
Ода энд Суврһна тосхлтыг йосндан эклв. Кергтә цуг тоот белдгдв. Шаҗна номта цаасн белдгдв, цаца шаврар шавҗ кегдв. Шаҗна әрүн тоот хулдҗ авгдҗ, суврһнд орулҗ тәвгдҗәнә.
Әрүн эн кергиг шаҗна цуг йосар кехәр Бурхн Багшин Алтн сүмин администратор Йонтен гелңгд үрвр кеһәд, ном умшулв. Суврһн тосхгдх бәәрнд Йонтен гелң шаҗна йосрхл күцәһәд, мөргүл кев. Әмтн һазр-усна сәкүснд нерәдәд, һурвн цаһан, һурвн әмтәхн хотар бәрц бәрәд, йосрхлд орлцҗ, зальврцхав. Суврһ тосхлһн шаҗна ик чинртә үүлдвр болҗана. Суврһн тосхгдсн һазрт амулң-менд бәәдл тогтҗ, цугтан ни-негн бәәнә. Суврһиг тосхсн, суврһнд ирҗ мөргсн, өөгүрнь эргҗ йовсн, нааран бәрц авч ирҗ, күндллһән медүлсн күн болһн килнцәсн сулдҗ, буй хурана.
Олнд туста кергиг Шатта селәнә әмтн иигәд хамцу чидләр кеҗәнә.

ҖИРҺЛИН Кермн

Видео