Райод хоорндк төв бүрдәгдҗәнә

21-08-2020, 15:15 | Таңһчин зәңгс » Эрўл-менд харлһн

Хальмг Таңһчин эрүл-менд харлһна министерств райод хоорндк медицинск төв бүрдәлһнә көдлмшиг цааранднь давулҗана. Тиим нег төв Лаганя района эмнлһнә улд үүлдхмн. Энд ода чинртә төсвс бәәдл-җирһлд тохралһна керг-үүлдврмүд күцәгдҗәнә. Тиигәд, энд түргн медицинск дөң күрглһнә госпиталь, гүлгн гемтә улст амбулаторн дөң күрглһнә болн 2-ч девсңгин травматологическ төвмүд бүрдәлһнә төрмүд хаһлгдҗана.
Лаганя района эмнлһнә ах эмч Шарапа Николайин келсәр, эн төсвс күцәлһнд «Әмд» гидг буйнч седклин саң болн нертә хирург Башанкан Бадм ик дөң-тусан күргҗәнә. Шидр «Әмд» гидг саң эмнлһнд лапароскопическ аппаратур йилһв. Терүг олзлҗ района эмнлһнд өөдән чинртә месллһ кеҗ болхмн. Өөрхн иргчдән талдан чигн немр оборудовань йилһгдхиг эдн күләҗәнә. Травматологическ төвд ода деерән өдгә цага месллһс кегдҗәнә, шав авсн улст түргн болн чинртә дөң күрггдҗәнә. Хам-хоша бәәдг регионмудла нөкцҗ үүлдхин төлә бат залһлдан батрулгдҗана гиҗ ах эмч темдглв. Тиигәд Волгоградск болн Астраханск мүжмүдин эмнлһслә эдн сән залһлда бәрҗ үүлдҗәнә. Района эмнлһнә травматологическ төвин эмчнр орн-нутгин нүүрлгч специалистнрлә ямр нег төрәр селвлцҗ эмнлһ кенә.

ДООҖАН Наталья

Видео