Хааһул гемәс саглх

21-08-2020, 16:01 | Таңһчин зәңгс » Эрўл-менд харлһн

Хальмг Таңһчин эрүл-менд харлһна министр Кикенә Юрий шуд залһлдана йовудт коронавирус гемин туст тогтсн бәәдлин тускар ахрар келҗ өгв. Пандемий эклсн цагас авн мана таңһчд 3669 күн COVID-19 гемәр гемтв. Сүл хонгт дәкәд 69 күүнд эн хальдврта гем илдкгдв гиҗ министр зәңглв. Ут тоодан 2479 күн эмнлһ авад эдгв. Ода эмнлһнд бәәдг улсас 12 күн күндәр гемнҗәнә, теднәснь 4 күн ИВЛ аппаратд бәәнә. Таңһчин госпитальмудт 361 күн эмнлһ авчана. Көтчнрә районд - 26, Яшкулин -17, Яшалтан – 16 болн Хар Һазра районд – 14 күн госпитальд бәәнә. Ода деерән таңһчин эмнлһст дәкәд немр 60 орм бәәнә.
- Сурһулин шин җил удл уга эклх, тегәд би эк-эцкнрт дуудвр кехәр седҗәнәв. Сурһульд зуг багшнр чирәдән хааһул өмсх зөвтә гисн неквр бәәдг болв чигн сурһульчнр бас терүг өмсх зөвтә гиҗ тоолҗанав. Тегәд күүкдтәһән күүндәд, саглуллһна керг-үүлдврмүдин тускар цәәлһҗ өгтн гиҗ сурҗанав. Өрүнднь сурһульдан адһҗ йовх күүкд-көвүд олна көлгн-күчнд, школд харһна, кичәлмүдин хоорнд болдг завсрт чигн эдн хамдан наадна, лавкд чигн одна. Тегәд олн әмтн цуглрдг һазрт чирәдән эрк биш хааһул өмсх кергтәг күүкдтән зааҗ медүлҗ өгтн. Хааһул эн хальдврта гемәс саглна. Эн гем мана бәәдл-җирһлд батрад үлдв. Энтн мана җирһлд бәәдг грипплә әдл болҗ үлдх гем болҗана. Тегәд хамгин түрүнд саглуллһна некврмүд күцәҗ, эрүл-мендән батрулх кергтә, - гиҗ Юрий Викторович келв.
Зәрм әмтн эн гем әәмшгтә болҗахд иткхш. Болв, министрин келсәр, эн гемәс көлтә 48 күн сәәһән хәәснь эн зөвәр әәмшгтә болн күцц шинҗлгдәд уга гем болҗана гив. Гемнсн улсин тооһас 48 күн насан барсн улсин тоог талдан регионмудла дүңцүлхлә ик биш болв чигн энтн өрк-бүл болһна зовлң болҗана гиҗ Юрий Викторович темдглв.

БАТАН Наталья

Видео