Хаслһна диг-даран утдулгдв

24-08-2020, 16:06 | Таңһчин зәңгс » Эрўл-менд харлһн

Коронавирус гем тарлхалһна туст әәмшг учрҗахас иштә Хальмг Таңһчин Толһач Хаска Батун зәрлгәр хаслһна диг-даран һаха сарин 6 күртл цааранднь болхмн гиҗ шиидгдв. Харм төрхд, сүл өдрмүдт мана таңһчд тәвн-җирн һар күн эн гемәр гемтснь илдкгдәд бәәнә, тегәд саглуллһна керг-үүлдврмүдиг цааранднь күцәх кергтә.
Хальмг Таңһчин эрүл-менд харлһна министерствин зәңглсәр, пандемий эклсн цагас авн мана таңһчд 3784 күүнд коронавирус гем илдкгдв. Сүл хонгт зуг 9 күн гемтснь медгдв, болв лабораторьмуд эд-бод келһнд хаагдсна ашт амрлһна өдрмүдин хөөн иим то-диг болдгиг мартхмн биш. Эмнлһ авад 2498 күн эдгсн бәәнә. Ода госпитальмудт эмнлһнд 378 күн бәәнә, теднәснь күнд кевәр гемнҗәх 12 күүнәс 8-нь ИВЛ аппаратд бәәнә. Насан барсн улсин то сольгдсн уга, 48 күн эн гемәс көлтә сәәһән хәәв. Таңһчин райодын эмнлһст үүлдҗәдг госпитальмудт гемтә улсин то баһрҗахш, Көтчнрә районд ода 22 күн бәәнә, Хар Һазра, Яшкулин болн Яшалтан райодт 16-18 күн эмнлһ авчана.
Сүл цагт мана таңһчд предприять-бүрдәцст хамдан көдлҗәх улст эн гем нег-негнәснь хальдснь илдкгдҗәнә. Тегәд таңһчин бачм бәәдлин штабин сүүрт эн төр бас хәләгдәд, санитарн-эпидемиологическ некврмүдиг эс күцәснәс иштә көдләчнрнь олар гемтсн һардачнрин даавр өөдлүлхмн гиҗ шиидгдв. Кемр тиим йовдлмуд учрхла һардачнр шоодврла харһулгдхмн.

Мана зәңгч

Видео