Цуг некврмүд күцәгдх йоста

26-08-2020, 16:34 | Таңһчин зәңгс » Эрўл-менд харлһн

Удл уга, дарук долан хонгт, сурһулин шин җил эклх. Зуг эн дааврта кемин алднд мана Хальмг Таңһчд коронавирус гем улм түгәд, бичкдүдин төлә ик әәмшг учрана. Өцклдүрк Хальмг Таңһчин эрүл-менд харлһна министерствин зәңглсәр, COVID-19 гем делгрснәс авн мана таңһчд 3913 күн эн гемәр гемтв.Ут тоодан мана нутгт 2580 күн эмнлһ авсна хөөн эдгв. Сүл хонгт кесн шинҗллтсин ашар 57 күүнд эн хальдврта гем илдкгдв. 10 күн күнд бәәдлд тусв, теднәс 8 күн ИВЛ аппаратын дөңгәр бәәнә. Һундл төрхд, сүл хонгт эн гемәс хойр күн насан барв, ода 50 күн өңгрснә тускар оперштаб зәңглҗәнә.
Хальмг Таңһч үүлддг Роспотребнадзорин заллтын һардач Санҗин Җаңһрин келсәр “сүл долан хонгт таңһчин госпитальмудт дәкәд 100 орн һарһҗ белн кех. Яһад гихлә, намрин цагт хальдврта гемәр, халу дүрсн, ханядн гемәр гемтсн улсин то эрк биш икдх. Сурһулин шин җил эклхәр бәәнәвидн. Зуг һаха сарин 1-д цуг сурһулин байрт һанцхн 1-ч болн 11-ч әнгин сурһульчнр орлцх. Линейкс эрк биш һаза давулгдх. Эк-эцкнр күүкдәс тустан алс-зә бәрәд, чирәдән хааһул өмсәд зогсх йоста. Классмудт күүкдиг яһҗ суулһхин тускар, багшнр-күүкд завсрт бийән яһҗ бәрхин тускар, хот-хол яһҗ эдлхин тускар кесг сурврмуд ода деерән Сурһуль-номин министерствла болн сурһулин һардачнрла хаһлҗанавидн. Өрүн болһн сурһульд орҗ ирсн бичкдүдин халуна кемҗән хәләгдх йоста. Эннь маш чухл керг. Юңгад гихлә, һаха сарин 1-д Дунд сурһульд 35 миңһн шаху күүкд болн 7500 багшнр орлцх. Ик сурһульд – 8500 оютнр, 2000 багшнр орлцҗана. Тегәд ут тоодан 50000 күн сурһульмудын бүрдәцст орлцх. Коронавирус гемәс хөрлһнә төлә хотл балһснд болн райодт цуг сурһульмудт санитарн некврмүд күцәлһнә туст бүртклһнә керг-үүлдврмүд күцәгдх йоста”, – гиҗ Санҗин Җаңһр келв.
Эн дааврта кемлә хамцу комиссьмүдин гешүд олн әмтн цуглрдг һазрт, нег үлү сурһульмудт саглуллһна керг-үүлвдрмүд ямр кевәр күцәгдҗәхиг шинҗлх йоста. Юнгад гихлә, ик зунь нүүртән хааһул өмсҗ, эн хальдврта гемәр гемтшгоһар саглҗахнь медгднә. Болв зәрм улс цуг эн некврмүдин тускар мартв эс гиҗ төртән авчахш. Зуг эдн бийиннь тускар эс ухалҗадг болхла, хамдан бәәдг медәтнрин, бичкдүдин тускар ухалх зөвтә. Тегәд һазаран һархларн бийән чикәр бәрҗ, бийиннь болн тана өөр бәәх улсин эрүл-мендин тускар ухалтн гиҗ дәкәд нег сурҗанавидн.

МАНҖИН Намру


#Стопкоронавирус08 #ПрофилактикаКоронавируса #РежимОграничений #Самоизоляция

Видео