Өөнләнь йөрәҗ, ачлвр бәрүлҗ өгв

31-08-2020, 15:57 | Таңһчин зәңгс » Хальмг Тањєчин Толєачин ґдр-бўр

Шидр Хальмг Таңһчин Толһач Хаска Бату таңһчин Деед зарһин Ахлач Валерий Петренкола харһҗ, «Хальмг Таңһчин ачта юрист» гидг өөдән нер зүүлһснләнь йөрәв.
– Валерий Леонтьевич таңһчин Деед зарһин һардач болҗ олн җилин туршарт үнн-чик седклтәһәр көдлҗәнә. Эн даавран күцәмҗтәһәр күцәҗ үүлдҗәнә. Зака батллһна, иргнмүдин зөв харслһна халхд ик ач-тусан күргснь маһд уга, – гиҗ Бату Сергеевич темдглв.
Тер мет таңһчин Толһач Валерий Леонтьевичиг 55 насна өөнләнь йөрәһәд, бат эрүл-менд, чидл-омг, зуралсн тоотан күцәҗ шаңһа дааврта үүлд өөдән күцәмҗд күрхиг дурдв. «Валерий Леонтьевичин авг-бәрцнь, цергә даалһвртан итклтә болдгнь мана нег һазра улсин зөв харслһна чинриг өөдлүллһнд туслх гиҗ ицҗәнәв», – гиҗ таңһчин Толһач келв.
Валерий Петренко Городовиковск балһснд төрсмн, тенд өсәд-боссмн. 1990-ч җилд Казанск ик сурһулин хууль-закана факультетиг йилһән сәәнәр төгсәсмн. Ик сурһулин төгсәснә хөөн Валерий Леонтьевич күч-көлснә хаалһан цагдан мөшклһнд болн прокуратурт эклв. 2001-ч җил күртл Городовиковск района зарһ толһалсмн, хөөннь Хальмг Таңһчин Деед зарһд зарһч болҗ үүлдв. 2005-ч җиләс авн Хальмг Таңһчин Деед зарһин Ахлачин дарукин үүл дааҗ йовсмн. 2020-ч җилд Әрәсән Президентин зәрлгәс иштә таңһчин Деед зарһин Ахлачин үүлд зурһан җилин цаг-болзгт хойрдад батлгдв.

БАТАН Сәәхлә
ЗУРГТ: Хальмг Таңһчин Толһач Хаска Бату таңһчин Деед зарһин Ахлач Валерий Петренкола харһсн кем

Видео