Седклин гемтә Диспансерт гемтсн әмтн илдкгдв

31-08-2020, 16:10 | Таңһчин зәңгс » Эрўл-менд харлһн

Тогтсн авъясар өдр болһн Хальмг Таңһчд үүлддг Роспотребнадзорин заллтын һардач Санҗин Җаңһр эс гиҗ Хальмг Таңһчин эрүл-мендин министр Кикенә Юрий маднд коронавирус гемин туст тогтсн бәәдлин тускар зәңглҗәнә. Шидр давсн амрлһна өдрмүдт дәкәд гемтсн әмтнә то улм икдҗәнә гиҗ келх кергтә. Өцклдүрк Санҗин Җаңһрин зәңглсәр, COVID-19 гем делгрснәс авн мана таңһчд 4326 күн эн гемәр гемтв. Амрлһна хойр өдрин хөөн 189 гемтә күн илдкгдв. Эднә ик зунь болхла, Приютна районд бәәршлдг седклин гемтә Диспансерин эмчнр болн гемтсн әмтн дотр илдкгдв. Тенд дор ормдан COVID-19 гем хөрлһнә эмнлһ бүрдәсмн.
Өцклдүрк кевәр Хальмг Таңһчд эмнлһнә цуг госпитальмудт 488 күн бәәнә, гертән эмнлһ авчах әмтнә тонь – 2013 күн. 14 күнд бәәдлд туссн бәәнә, теднәснь 11 ИВЛ аппаратын дөңгәр ки авчана. Мана нутгт эн хальдврта гем тархаснас авн ут тоодан 2580 күн эмнлһ авсна хөөн эдгв. Һундл төрхд, сүл хойр хонгт дәкәд 2 күн насан барв, ода 56 күн өңгрснә тускар Санҗин Җаңһр келв.
Ноха сард өдр ирвәс гемтсн әмтнә тонь өсәд йовна, – гиҗ Роспотребнадзорин заллтын һардач Җаңһр Николаевич дәкн нег давтчана. – Юңгад гихлә, эн сард мана бәәрн улс, хаврас авн харһҗ чадсн уга учрас ода элгн-садарн хурад, байр-хүрмән давулад, саглуллһна некврмүдән төртән авлго бәәцхәнә. Тегәд, буйн болтха, байр-нәәрән саатад, талдан җилд эс гиҗ пандемий бәәдл уга цагт кеҗ өгтн гиҗ дурдҗанав. Ик, дунд сурһульмудын болн сурһуль давуллһна тускар бидн бас тогтавр һарһлавидн. Эн тогтаврас иштә цуг сурһульмуд һаха сарин нег шинәс эклҗәнә, зуг сурһуль болһнд кичәлмүдиг үдин өмн болн үдин хөөн болх кичәл гиҗ әңглх йоста, кичәлин җурм энүнәс иштә тогтах йоста болҗана. Дәкәд нег сарин туршарт бидн хәләвр кехвидн, цааранднь тегәд медгдәд бәәх. Өрүн болһн күүкән сурһульд йовулхиннь өмн эрк биш халуна кемҗәг, күүкнәннь бәәдлиг хәләтн гиҗ эк-эцкнрт бас нег медүлхәр бәәнәвидн. Гемтсн күүкиг сурһульд бичә йовултн, гертән үлдәһәд эмчнриг дуудтн.
Эн хальдврта гемин 1-ч девсң дуусад, ода 2-ч девсң ирҗәнә гиҗ келҗ болшго. Яһад гихлә, мана таңһчд 1-ч девсң дуусад уга билә. Ода болхла, гемтсн әмтнә тонь улм өсәд ирсн бәәнә. Тедү дүңгә намрин цагт хальдврта гемәр, халу дүрсн, ханядн гемәр гемтсн улсин то эрк биш икдх. Ода деерән Хальмг Таңһчин цуг госпитальмудт 580 орн бәәнә, – гиҗ Кикенә Юрий немәд келв.
Тегәд саглуллһна некврмүд күцәлһнә тускар, чирәдән хааһулыг эрк биш өмсх кергтәһиннь тускар таңһчин эрүл-менд харлһна министр Кикенә Юрий бас темдглв. Өрк-бүлд чик авг-бәрцин тускар күүнддг болхла, эк-эцкнь үрндән саглуллһна керг-үүлдврмүдин тускар келсн деерән бийснь үлгүр үзүлҗ санитарн некврмүд күцәдг болхла, тер цагт бичкдүд чигн бас саг бәәхнь лавта.
Ирх долан хонгас авн мана таңһчд гриппәс тәрлһнә дааврта кем эклхмн. Намрин-үвлин кемд эн хальдврта гемәр әмтн баһар гемтхин төлә таңһчин улсин 60 процент тәрлһ авх зөвтә. Эн керг-үүлдвр өңгәр кегднә, мана таңһчд кергтә вакцин йилһгдсн бәәнә.

МАНҖИН Намру

Видео