Медәтнриг өөнләнь йөрәв

01-09-2020, 15:18 | Таңһчин зәңгс » Хальмг Тањєчин Толєачин ґдр-бўр

Ноха сард ончта өөнән темдглсн дәәнд орлцачнрт болн тылд көдлҗ йовсн ветеранмудт Хальмг Таңһчин Толһач Хаска Бату йөрәлин бичг илгәв. Давсн сард Төрскән харсгч Алдр дәәнд орлцсн хойр ветеран һарсн өдрән болн баахн настадан тылд көдлҗ йовсн 17 күн 90 болн 95 җилин ончта өөнән темдглв. Һарсн өдрләнь Хальмг Таңһчин Толһач Хаска Бату эднд җиңнүләд, өөнләнь йөрәҗ, бәәдл-җирһләрнь соньмсв.
Һарсн өдрән темдглсн медәт болһнд таңһчин Толһач белг өгүлв. Пандемий учрснас иштә ветеранмудт белгнь санитарн некврлә ирлцҗ бәрүлҗ өггдв. Дәәнә цагт тылд көдлҗ йовсн медәтнрт Әрәсән Президентин йөрәлин бичг бәрүлҗ өггдсн билә.
Медәтнр эднд килмҗән тусхаҗ өөнләнь йөрәснд байрлад, Бату Сергеевич цол олад эднд бийнь җиңнүлҗ белгән илгәснд ханлтан өргв. Тылд орлцач Ачинә Анна келсәр, урднь энүг иигҗ йөрәһәд уга билә. «Бату Сергеевич цол олад, нанд җиңнүлҗ күүндв, өөнләм йөрәв. Кех-күцәх көдлмш дала болв чигн, кесг чинртә төрмүд хаһлх кергтә болв чигн эн намаг тевчәд, ач-тусм темдгләд, бүлән үгән келв. Эннь нанд ик чидл-омг өгв. Таңһчин цуг улс цаһан хаалһта болтха, эрүл-менд бәәтхә, мана бичкн төрскн делгрәд, цецгәрәд йовтха», – гиҗ Анна Аджиновна келв.
- Ончта өөнән темдглҗәх күн болһнла күүндәд, залу-зөрмг кевәр дәәлдҗ, күнд цагла баахн цагтан тылд көдлҗ йовсн, төрскн һазр-усндан эңкр улст ханлтан өргх арһ нанд учрснд би байрлнав. Эдн дәәнә болн төвкнүн цагт үнн-чик седклтәһәр көдлҗ йовсмн, бидн эднә ач-тус мартх зөв уга болҗанавидн, – гиҗ Бату Сергеевич темдглв.
Төрскән харсгч Алдр дәәнд орлцсн Елизавета Николаевна Чонаева болн Менген Пюрбеевна Теблеева 97 нас зүүв. Эдн баахн насндан дәәнә һалд орлцҗ, залу-зөрмг кевәр дәәлдҗ йовсмн. Тылд көдлҗ йовсн улс дундас Мария Ивановна Елина, Мацак Тюрбеевна Шалбурова, Анна Аджиновна Ачинова болн Екатерина Арсентьевна Скрипкина хамгин настань болна, эдн 95 җилин өөнән темдглв.

ДООҖАН Наталья
Зургт: дәәнә ветеран Елизавета Чонаева

Видео