Баһчуд төрскн һазртан көдлхиг урмдулхар

08-09-2020, 14:26 | Таңһчин зәңгс » Эрўл-менд харлһн

Эн җил мана таңһчд 18 модульн ФАП тосхгдхмн гиҗ зуралгдҗана. Нидн таңһчин селәдт 12, урзн болхла 6 фельдшерск-акушерск пункт углҗ тәвгдсн билә. Бичкн селәдт бәәдг әмтнд цаглань түрүн медицинск дөң күргҗ, олн зүсн гемәс эдниг саглулҗ тәрлһ кехин, эднә эрүл-менд шинҗлҗ чинртә туслмҗ күргхин төлә өдгә цага ФАП-муд тосхгдҗана.
Шидр Хальмг Таңһчин Толһач Хаска Бату Приютна районд көдлмшин кергәр одхларн Воробьевка селәнд тосхгдҗах фельдшерск-акушерск пункт хәләсн билә. Удл уга эн өдгә цага объект эдлврт орулгдҗ, сән кергсл теткгдхмн. Таңһчин Толһачин келсәр, фельдшерск-акушерск пунктс тосхлһна көдлмш эклсн цагт тедниг кадрмудар тетклһнә төр нәрн болҗахнь ил медгдв. Зәрм селәдт шин пунктд көдлдг күн уга болна. Әрәсән Президент нидн зунар түрүн дөң күрглһнә эрүл-менд харлһна көдләчнриг белдлһнә төр хаһлх кергтә гиҗ неквр тәвсн билә. Орн-нутгин Президентин даалһвриг бәәдл-җирһлд тохрахин төлә мана таңһчд баһчудыг эрүл-менд харлһна көдләчин эрдм дасхиг урмдуллһн керг-үүлдврмүд эклв гиҗ Бату Сергеевич темдглв.
– Эн сурһулин җилд Хахлына Тамаран нертә медколледжд таңһчин райодас 50 күүкн-көвүн сурһуль сурчана. Эдн эмнлһнә, саата күүкд улст дөң болдг дунд эрүл-мендин көдләчин эрдм дасчана. Сурһулян төгсәснә хөөн эдн төрскн селәндән эрк биш ирҗ көдлх зөвтә болҗана. Дөрвн җил давад эн баһчуд селәдин эмнлһст ирҗ көдлхмн. Тер мет сурһуль сурчасн цагтан эдн немр эрдм бас дасхнь темдгтә. Хальмг медколледж эрүл-менд харлһна көдләчнриг белдлһнә халхар күцәмҗтәһәр үүлдҗәнә. Эн сурһульд сурсн баһчуд эндр COVID-19 гемәс хөрлһнд, хальдврта гемәр гемтсн улсиг эмнлһнд ик тәвцән орулҗ йовна. Района муниципальн бүрдәцин даалһврар эрүл-менд харлһна көдләчин эрдм дасх саната баһчуд баһ биш бәәхнь өөрхн иргчдән эдн таңһчин селәдин әмтнд түрүн дөң күргҗ үүлдхнь байрта. Бидн цуг халхарн эднд дөңгән күргхвидн, – гиҗ таңһчин толһач келв.
Эн төр хаһллһна халхар Городовиковск района муниципальн бүрдәц байн дамшлт хоршаҗ, наадк райодт үлгүр-үзмҗ болна. Района эмнлһнә һардвр РМО-н дөң-тусар эрүл-менд харлһна көдләчин эрдм дасх саната баһчудыг урмдулҗ мергҗлтнр белдлһнә төриг күцәмҗтәһәр хаһлҗана. Медколледжд сурчах баһчудт района шаңһас немр стипендь баһчудт өгнә, сурһулян төгсәснә хөөн эдниг района эмнлһнд көдлмшәр теткнә. Мана газет эн көтлврәр сурһуль сурад, ода төрскн һазртан көдлҗәх баһчудын тускар бичлә. Келхд, тедн дунд «Земск фельдшер» гидг федеральн көтлврт орлцад, 500 миңһн арслңга дем авсн баһчуд бәәнә.
Целинн района Ик Чонса болн Аршан Булг селәдт удл уга модульн фельшерск-акушерск пункт углҗ тәвгдхмн. Өдгә цага болн сән таалта объектс «Хальмг Таңһчд эрүл-менд харлһна делгрлт» гидг шаңһа көтлврәр тосхгдҗана. Келхд, районд иим ФАП урднь Овата, Чаһрт, Джурак, Бурһст селәдт углҗ тәвгдсн билә. Эн селәдин бәәрн улс ода гер деерән түрүн эрүл-мендин дөң авч, района эмнлһнд одлго эрүл-мендин бәәдлән шинҗлнә.
Ода Ик Чонса болн Аршан Булг селәдин муниципальн бүрдәцст шин модульн ФАП углҗ тәвхин төлә белдврин көдлмш күцәгдҗәнә. Ик Чонса селәнә муниципальн бүрдәцин толһач Хөөчин Валентинан келсәр, шин объектиг альд тәвхин тускар эдн удан ухалсн уга. Терүг хуучн ФАП-ин өөр тәвхәр шиидв, юңгад гихлә эн һазр әмтнд тааста болна. Шин пункт углҗ тәвлһнә төлә орминь белдхд района бюджетәс 150 миңһн арслң йилһгдв. Ода фельдшерск пункт тосхх һазринь цеврләд, эн сарин чилгч күртл улынь тәвхмн.
Целинн СМО-н толһач Бегликә Саврин келсәр, эднә селәнд бас модульн пункт углҗ тәвлһнд белдвр эклсн бәәнә. Терүг тосхх һазр йилһгдв, ода терүнд техническ таал тогталһна көдлмш кегдҗәнә. Ода тенд ул тосхлһна төлә һазр малтад, септик болн усна турвас углҗ тәвлһнә төлә орминь белдҗәнә.
Эн селәдин бәәрн әмтн фельдшерск-акушерск пункт тосхгдҗ, эднд түрүн эрүл-мендин дөң күрглһнә төлә таал тогтагдхиг теңкән уга күләҗәнә. Эн объект эдлврт орулгдсн цагт селәнә әмтн дарунь эмчд бийән үзүлҗ, зәрм шинҗллт кеҗ чадхмн. Селән һазрт эрүл-мендин туслмҗ күрглһнә чинр ясрхла әмтн эрүл-менд бәәҗ, ут нас наслҗ чаң-чиирг болх гиҗ эдн ицҗәнә.

ДООҖАН Наталья

Видео