Түргн дөң күргхәр

15-09-2020, 15:38 | Таңһчин зәңгс » Эрўл-менд харлһн

«Түрүн медико-санитарн дөң күрглһнә делгрлт» гидг региональн төсвин медлд мана таңһчд санавиацар бачм дөң күрглһнә керг-үүлдврмүд күцәгдҗәнә. Эн җил эн төсвин керг-үүлдврмүд бәәдл-җирһлд тохралһна төлә 75 сай арслң йилһгдсмн, терүнәснь 98 процентнь федеральн бюджет даав. Эн кергт йилһгдсн мөңгәр санавиацин бригад 115 дәкҗ бачм дөң күргхин төлә һарч йовхмн. Эн җил санавиацин туслмҗиг «Авиакомпания СКОЛ» гидг ООО болн «Санавиацин келн-улсин цергллт» гидг АО күргҗәнә.
Эн җилин түрүн өрәлд эдн түргн дөң күргхәр 22 дәкҗ нисҗ һарад, 24 пациентиг эмнлһнд күргв. Бачм дөң керглгдсн улс дунд 2 саата күүкд күн болн 2 бичкн билә. Гемтә улс дунд зүркнә-судцна, нейрохирургическ халхин гемтә улс болн хаалһд учрсн зеткртә йовдлд шарх-шав авсн күн бәәсмн. Санавиац 23 гемтә күүг таңһчин эмнлһнд болн 1 күүг Әәдрхн балһсна зүркнә-судцна хирургийин федеральн төвд күргв.
2020 җилин хойрдгч өрәлд «Түргн медицинск дөң күрглһнә болн аюлын медицинә таңһчин төв» гидг бүрдәц «Авиакомпания СКОЛ» гидг ниицәнлә хамцу үүлдврин бооца батлв. Хальмг Таңһчин әмтнд бачм медицинск дөң күрглһнә төлә «АНСАТ» гидг медицинск вертолет ирсн бәәнә. Эн көлгн эн җилин чилгч күртл таңһчин әмтнд санитарн авиационн дөң күрглһнд олзлгдхмн.

Мана зәңгч

Видео