Хальмг эмчнрин үүлдвриг үнлв

21-09-2020, 17:17 | Таңһчин зәңгс » Эрўл-менд харлһн

Давсн долан хонгт Хальмг Таңһчин Толһач Хаска Бату Әрәсән эрүл-менд харлһна министерствин фтизиопульмонологин болн хальдврта гемин медицинск шинҗллтин Келн-улсин төвин көдләчнрлә харһв. Федеральн экспертмүд таңһчин Толһач Әрәсән эрүл-менд харлһна министр Михаил Мурашкола болсн күүндврин ашар ирсмн. Эдн коронавирусн гемәс хөрлһнә таалд таңһчин эрүл-менд харлһна системин көдлмшиг үнлх күслтәһәр ирв. Келн-улсин төвин бүрдәмҗин-методическ көдлмшин төрәр үүлддг директорин дарук Вадим Тестов болн фтизиатр, пульмонолог Евгений Попов коронавирус гемәс хөрлһнә көдлмш күцәлһнд орлцҗах эмнлһсин үүлдвриг үнлв.
Шидр Москваһас ирсн гиичнр П.Жемчуевин нертә таңһчин эмнлһнд, Элст балһсна поликлиникд болн таңһчин бичкдүдин медицинск төвд одад, амбулаторн болн стационарн әңгүдин көдлмшлә таньлдв. Хөөннь эдн хальдврта гемәс эдгәлһнә госпитальмудт болн түргн медицинск дөң күрглһнә станцд одад, COVID-19 гемәр гемтсн улст ямаран эмнлһ кегдҗәхиг бүрткв. Тер мет эдн эмнлһсин материальн-техническ ул хәләв, гемтә улсиг эмәр тетклһнә төр яһҗ хаһлгдҗахиг, ПЦР-шинҗллт болн компьютерн томографь яһҗ кегдҗәхиг шинҗлв.
Түрүн өдрин аш диглҗ, таңһчд гемтә улст дарунь дөң күрггдҗәнә, эднә эрүл-мендин бәәдл цаглань шинҗлгдҗәнә, эмнлһс саглуллһна кегдлмүдәр теткгдсн бәәнә, теднә материальн-техническ тетквр сән гиҗ гиичнр темдглв. Дәкәд таңһчин һардврин шиидврәр хальдврта гемтә улсин эмнлһ кеҗәх көдләчнрт немр демин мөңг таңһчин бюджетәс өггдҗәхиг эдн өөдәнәр үнлв.
- Эмнлһст немр орм бүрдәлһнә тускар күүндвидн. Ода деерән маднд сул орм бәәнә, болв тер бийнь намрин-үвлин кем эклҗәхәс иштә бәәдл сольгдхин тускар ухалх кергтә. Экспертмүдин үнллһн маднд көдлмшән ясрулҗ, әмтн олар царцад гемндг кем эклхәс урд белдврин керг-үүлдврмүд күцәх арһ өгхмн. Федеральн экспертмүд ирснь эн амр биш цагиг давхд туслх, - гиҗ таңһчин толһач келв.

ДООҖАН Наталья

Видео