Оютнр дөңгән күргҗәнә

29-09-2020, 09:33 | Таңһчин зәңгс » Эрўл-менд харлһн

Пандемий шиңкән эклҗәсн цагт Хальмг Таңһчин Толһач Хаска Бату Т.Хахлынован нертә медколледжин ах курсмудын оютнрла харһҗ, эдн хальдврта гемәс хөрлһнә дааврта кергт орлцҗ, ах үүрмүдтән дөң болхиг сурсн билә. Тер харһлтд сурһулян төгсәҗәх оютнр орлцсмн, тегәд кесгнь Бату Сергеевичин дуудвриг дөңнәд, хальдврта гемәс эдгәлһнә госпитальмудт көдлх санаһан медүлсмн. Темдглхәс, кесгнь госпитальд көдлснә хөөн таңһчин эмнлһст көдлхәр үлдв, эн әәмшгтә гемәс хөрлһнә халхар цааранднь үүлдхәр шиидәд мергҗлтән өөдлүлхәр шиидв. Зәрм оютнр Элст балһсна поликлиникд «шуд залһлдана» телефона тойгар әмтнд цәәлһвр өгв.
Хөөннь 2-ч курст сурчах баһчуд чигн эн чинртә кергт бас орлцҗ госпитальд санитармуд болҗ көдлх санаһан медүлв. Теднә негнь «Эмнлһнә керг» гидг зөрүллтәр сурчах оютн Басңга Адьян болна. Сурһулян сәәнәр сурдг, сурһулин бүрдәцин бәәдл-җирһлд шунмһаһар орлцдг баахн көвүн эн әәмшгтә гемәс хөрлһнә кергт үүрмүдтәһән хамдан орлцсмн. Дөрвн сарин туршарт эн 3-ч тойгта госпитальд ах үүрмүдтән дөң болҗ, гемтсн улсиг килмҗән өгч хәләв. Келхд, Адьян экиннь үлгүрәр эн эрдм шүүҗ авсмн. Валентина Сергеевна Басангова олн җилдән таңһчин эрүл-менд харлһна халхар көдлҗ йовсмн. Һундл төрхд, эн ода мадн дунд уга, тегәд экиннь әрүн санл тевчҗ һурвн көвүнь эрүл-менд харлһна көдләч болхар шиидсн болдг. Ууһн Алдр көвүнь ода Казань балһснд эмчәр көдлҗәнә, Адьян болн Арслан медколледжд сурчана.
Адьяна келсәр, госпитальд көдлсн цагтан эдн эмчнрт болн дунд медицинск көдләчнрт дөң болдг билә. Эдн гемтә улсиг КТ болн УЗИ шинҗллтд күргдг бәәсмн, орна өлг-эдиг сольдг, әңгин палатмудыг ахулҗ, эргндкиг эд-бод кедг билә. Ямр нег хуучта эс гиҗ күнд кевәр гемнҗәх улс бийән асрҗ чаддго болхла эдн теднд хотынь өгәд, хувцинь соляд, бийинь уһадг бәәсмн гиҗ Адьян келв. Ах үүрмүднь эднд сүв-селвгән өгч, ямр нег кергиг күцәхд дөң болдг билә, тегәд эдн госпитальд көдлҗ байн дамшлт хоршаҗ авв.
- Коронавирус йир әәмшгтә гем болҗахиг бидн эврә нүдәрн үзвидн. Мана эмнлһсин эрүл-менд харлһна көдләчнр күн болһнд дөңгән күргҗ, гемәсн дарунь эдгҗ авхин төлә цуг арһ-чидлән олзлҗ, теднә әм аврхин төлә гүҗрҗ көдлҗәнә. Бидн госпитальд дигтә зуни сармудт көдлсн биләвидн, тегәд мана һаң халунд шишлң костюм өмсҗ, чирәдән болн нүдндән хааһул, көлдән ирзин һос өмсҗ өдрин дуусн көдлхд йир күнд болна. Болв тер бийнь цуһар көдлмшән үнн кевәр күцәҗ, эн әәмшгтә гемлә ноолда кеҗ йовхнь маднд, оютнрт, ик бахмҗ болв. Бидн ах үүрмүдәсн ард үлдлго бас көдлмшән даавртаһар күцәхәр шундг биләвидн. Гемтә улс эдгәд хәрсн цагтан бүлән үгән келхлә седкл байрлна,- гиҗ Адьян келв.
Ода Адьян 3-ч курст сурчана, сурһулян төгсәснә хөөн эн мединститутд цааранднь сурхар зуралҗана. Ахиннь үлгүрәр эн эмч болхар шиидв. Келхд, Алдар Казаньд хальдврта гемиг эдгәдг эмчәр көдлҗәнә, тегәд дүнь госпитальд көдлҗәсн цагт эн сүв-селвгән өгдг билә. Хойр ахан дураҗ Арслан чигн иргчдән бас эмч болхар шиидх чигн биз.

ДООҖАН Наталья
ЗУРГТ: Т.Хахлынован нертә медколледжин оютн Басңга Адьян (зүн бийәснь)
госпитальд көдлҗәсн кемд

Видео