Чик авг-бәрц делгрүлҗ

30-09-2020, 15:48 | Таңһчин зәңгс » Эрўл-менд харлһн

Шидр «РИА Новости» гидг зәңгллһнә агентств мана орн-нутгт чик авг-бәрцәр бәәдг регионмудын то-диг тогтав. Тиигәд иим әмтнә то ик болҗах регионмудын нүүрт Дагестан, Чечня болн Адыгей һарв. Хальмг Таңһч болхла 7-ч орм эзлв. Келхд, 2018 җилд мана таңһч 22-ч орм эзлҗәсн билә.
Эн агентствин экспертмүд чик авг-бәрцәр бәәдг регионмудыг йилһҗ авсн цагтан тенд спортар соньмсдг улсин то, әрк-чаһр болн тәмк хулддг кемҗәг, согту эс гиҗ наркотикд авлгдсн цагтан зака эвдлһнә йовдлмуд һарһсн то-дигиг учртан авсмн. Сүл җилмүдт мана таңһчд спортар соньмсдг, чик авг-бәрцәр бәәҗ цогц-махмудан батруллһнд ик оньг өгдг улсин то икдҗәхнь темдгтә. Өрүн эрт Элст балһсна паркд, Колонск боодгин көвәд, микрорайодт бәәдг спортивн талвңд әмтн йовһар йовдгиг, йоган занятьст орлцдгиг, гүүдгиг, һаза углҗ тәвгдсн спортивн тренажермудт цогц-махмудан батрулҗахиг үзҗ болхмн. Күүкд улс көдлмшиннь хөөн фитнес-клубмудт цаган тустаһар давулдг болв. Баһ болн дунд наста улс дунд эн сән авъяст тохрҗана. Ах үйин улс чигн бас чик авг-бәрцәр бәәхәр шунна, эдн скандинавск йовлһар соньмсна. Таңһчин әмтнә социальн теткврин төвд эрүл-мендин клуб үүлднә, терүнд орлцдг медәтнр цигун гимнастик кенә, йовһар йовна, махмудан батруллһна занятьст орлцна.
Мана редакцд урднь зург цокачар көдлҗ йовсн Лиҗин Николайин аваль Зольвана Роза олн җилин эргцд өрүн болһн бий деерән киитн ус асхна. Зуни-намрин кемд эн Колонск боодг тал йовһар йовҗ, уснд өөмнә. Тер төләд эн заглюн, чаңһ-чиирг болна. Медәт зуульчлхдан йир дурта. Най һарсн Замбан Николай эндр өдр күртл бичкдүдт спортивн гимнастикин занятьс давулҗана, бөдүн улс чигн дамшлтта багшин һардврт махмудан батрулна. Николай Убушаевич шав авсн улст эмнлһнә хөөн эрүл-мендән батрулхд тусан күргҗ, кесг улсиг эмнсмн. Нертә эмч Хоньна Валерий бас олн җилдән уул деер һарч, киитн уснд өөмҗ, дорд үзгин бөк бәрлдәһәр соньмсна. Баахн спортсмен Нарҗин Эрднь эрүл-мендин клубд занятьс давулна, эн нурһнь зовадг улст тусан күргнә.
Селән һазрин делгрлтин, балһснд сән кец-таал тогталһна болн нань чигн көтлврәр спортивн тавлңгуд тосхгдҗахнь әмтн чик авг-бәрцәр соньмсхд бас урмд өгнә. Таңһчин селәдт футбол нааддг болн һаза углҗ тәвгддг тренажермуд углҗ тәвгдснә ашт бичкдүд болн баһчуд спортар соньмсҗ цаган тустаһар давулна. Спортын халхар ик күцәмҗ бәрҗәх баһчуд дорас өсч йовх бичкдүдт үлгүр болҗахнь лавта. Тедниг дураҗ эдн бас спортар соньмсхар шунна.
Одахн Хальмг Таңһчин Толһач Хаска Бату чик авг-бәрцәр бәәх кергтә гиҗ бәәрн әмтнд дуудвр кеҗ, велосипедар йовснь туста болдгиг темдглсмн. Келхд, Бату Сергеевичин үлгүрәр зәрм дааврта һардачнр ода көдлмштән велосипедар йовдг болв. Шишлң хаалһс тосхҗ, сән таал тогтахла эн бас сән авъяст тохрхнь лавта.
Чик авг-бәрцәр бәәҗ, спортар соньмссн баһчуд аля-азд йовдлмуд һарһлго цаган тустаһар давулдгнь маһд уга. Тиигәд мана таңһч 22-ч ормас нег җилин эргцд 7-ч ормд һарснь ик күцәмҗ болҗана гиҗ келх кергтә. Му даслтан хаяд, спорт делгрүлҗ, терүнә төлә сән таал тогтаҗ олна нүүрт һарх күсл тәвх кергтә.

БАТАН Наталья

Видео