Сән гисн көдләчнриг ачлв

05-10-2020, 15:02 | Таңһчин зәңгс » Эрўл-менд харлһн

Өцклдүр нарт-делкәд эмчин Өдр темдглв. Эн өдриг 1971 җилд ООН-а шиидврәр зарлсмн. Ик кезәнәс авн эмчин эрдмтә улс күндтә, тоомсрта болҗ тоолгдна. Эндр цуг нарт-делкәд хальдврта шин гем учрад, кесг сай күн терүгәр гемтсн цагт эрүл-менд харлһна көдләчнр терүнәс хөрлһнд үнн кевәр церглҗ йовна. Мана таңһчд чигн эмчнр, дунд медицинск көдләчнр болн санитармуд эврәннь әмән әрвллго гемтә улсиг эдгәҗ авхин төлә көдлҗәнә.
Шидр эмчин нарт-делкән Өдр угтҗ П.Жемчуевин нертә таңһчин эмнлһнд болсн байрин керг-үүлдврт сән гисн көдләчнрин ач-тус темдглв, шинкән күч-көлснә хаалһан эклҗәх баһчудт күцәмҗ дурдв. Эн җил 25 баахн мергҗлт таңһчин һоллгч эмнлһнә коллективин ханьд орв. Сар хооран тавн баахн эмч энд күч-көлснә хаалһан эклв. Эннь травматологуд Учан Үлмҗ болн Натра Савр, эндоскопист Сучина Александр, невролог Даван Иса болн хирург Очра Баатр. Эдн Аһш, Әәдрхн болн Сарпуль балһсдт медицинск институт төгсәснә хөөн төрскн таңһчдан көдлхәр шиидв. Тер мет эн җил хөрн дунд медицинск көдләч сурһулян төгсәснә хөөн таңһчин эмнлһнд көдлхәр ирсн бәәнә, тедн дунд тавнь көвүд болна. Баһчудт эн харһлтыг тодлулҗ белг бәрүлҗ өгв. Кесг цаг давв чигн эдн эн өдриг бүләнәр тодлхнь лавта.
- Эврәннь күч-көлснә хаалһан таңһчин эмнлһнд эклҗәхнь сән, энд күн болһнд ах үүрмүд дамшлтарн хувалцҗ, сүв-селвгәрн дөңгән күргҗ, тана төлҗлтд нилчән күргх. Эрүл-менд харлһна көдләчин эрдм ик дааврта болн күнд, нег үлү эндрк амр биш цагла. Тегәд тесвртә болтн, әмтнд килмҗән тусхаҗ, көдлмшән үнн-чик седклтәһәр күцәхәр шунтн. Мана ниитә ик өрк-бүлд орснлатн йөрәҗәнәв. Хаалһтн цаһан болтха, - гиҗ таңһчин эмнлһнә ах эмч Бадм-Һәрән Очр йөрәв.
Таңһчин эрүл-менд харлһна делгрлтд ик тәвцән орулҗах, олн җилдән эн эмнлһнд көдлҗ йовх көдләчнрт эн өдр өөдән ачлвр бәрүлҗ өггдв. Ут тоодан һуч һар күүнә ач-тус темдглв, теднәснь арвн тавн көдләч «Эрүл-менд харлһна йилһән сән көдләч» гидг темдгәр ачлгдв. Тедн дунд эмчнр Ермолан Алексей, Четра Леонид, Баатра Алексей, Чүрүмә Гилян, Илҗирин Виктория, Манжин Василий, дунд медицинск көдләчнр Дарбака Татьяна, Колҗан Людмила, Санҗин Саглр болн нань чигн. Бас тер мет арвн тавн күн Әрәсән эрүл-менд харлһна министерствин Күндллһнә һашгар ачлгдв.
Темдглхәс, кесгнь эднәс пандемий эклснәс авн эмнлһнә улд үүлдҗәдг 3-ч тойгта госпитальд көдлв. Эдн өдр сө уга хальдврта гемәр гемтсн улсиг эдгәҗ авлһнд гүҗрҗ көдлсмн. Зәрмснь эндр чигн госпитальд көдлҗәнә, тегәд ачлвран авхар ирҗ чадсн уга.

ДООҖАН Наталья

Видео