Эмчнриг йөрәв

06-10-2020, 16:16 | Таңһчин зәңгс » Эрўл-менд харлһн

Җил болһн хулһн сарин түрүн Сарң өдрлә кесг орн-нутгт эмчин нарт-делкән Өдр темдглнә. Эн өдр эмчнрин ниицлтин болн эднә шунмһа үүлдврин өдр гиҗ тоолгдна.
«Негдсн Әрәсә» парть коронавирусар гемтсн улст дөң күргҗәх эмчнриг оньг угаһар үлдәхш. Тегәд шидр «Негдсн Әрәсә» партин региональн әңгин сегләтр, таңһчин Улсин Хуралын (Парламентин) Ахлач Анатолий Козачко эрүл-менд харлһна көдләчнриг сән өдрләнь йөрәһәд, Күндллһнә һашгуд бәрүлҗ өгв. Тиигәд П.Жемчуевин нертә таңһчин эмнлһнә эмчнр Эрнҗәнә Евгения болн Хоньна Дорҗ, Хальмг Таңһчин гигиенә болн эпидемиологин төвин ах эмч Конуша Светлана ачлгдв.
- Эн сәәхн намрин өдрлә мана эмчнрт йөрәлин үг келҗ бидн ач-тусинь темдглхәр шунҗанавидн. Энтн хамгин күндтә болн олн әмтнд кергтә эрдм шүүҗ авсн улсин байрин өдр болҗана. Эдн өдр болһн әмтнә әм аврҗ, олн зүсн гемәс мадниг эдгәҗ авна, маднд җирһл белглнә. Кабинетд эс гиҗ кеер көдлҗ йовхнь йилһл уга, тер юңгад гихлә үкләс аврҗ авсн күүнә җирһләс үнтәнь уга,- гиҗ «Негдсн Әрәсә» партин Хальмгин региональн әңгин сегләтр Анатолий Козачко йөрәлин үгдән келв.

БАТАН Наталья

Видео