Эмнлһнд сән таал тогтагдв

09-10-2020, 16:55 | Таңһчин зәңгс » Эрўл-менд харлһн

Урҗ өдр Приютное селәнд психоневрологическ диспансер ясврин хөөн байрин бәәдлд секгдв. Эн эмнлһн мана таңһчд 1963-ч җиләс авн үүлдҗәнә, энд седклин гемтә улст медицинск дөң күргнә. Тәв һар җилин эргцд энд капитальн ясвр кегдәд уга билә. Эн кергт Хальмг Таңһчин Толһач Хаска Батун зааврар 43 сай арслң йилһгдсн билә.
Темдглхәс, Бату Сергеевич таңһчин һардачнрас түрүн болҗ эн эмнлһнд ирҗ, гемтә улс ямаран таалд бәәхинь шинҗлсмн. Приютна районд көдлмшин кергәр йовсн цагтан эн диспансерин көдләчнрлә харһҗ күүндснә ашар энд ясвр келһнә төриг хаһлхиг болн эн кергт мөңг йилһхиг таңһчин правительствд даалһсн билә.
- Ясврин көдлмш төгсв. Нидн Әрәсән правительствин көрӊгәс йилһгдсн субсидәс энд ясвр келһнд мөӊг олзлх шиидвр авлав. Кесг арвад җилдән эн диспансер оньг уга бәәсмн. Социальн чинртә эн объект олн җилин эргцд иим му бәәдлд бәәхнь намаг өврүлв. Эмнлһнә бүрдәциг ясад энд сән таал тогтахин төлә бүкл җил керглгдв. Ода энд орань сольгдснас авн шин өлг-эдәр тетклһнә көдлмш күртл кегдв. Ясвр кесн деерән ус зөөдг хуучн «Зил» машинә ормд «КамАЗ» тамһта шин маши йилһҗ өгвидн. Диспансерин һардвр энд зарһин-психоневрологическ шинҗллтин бәәр тосххар зуралҗана. Темдглхәс, энд ясвр келһнә төр эмнлһнә һардврин болн көдләчнрин седвәрәр хаһлгдв. Эмнлһнә көдләчнрт болн ах эмч Ольга Харченкод гемтә улст килмҗән тусхадг болн эн төр босхснд ханлтан өргҗәнәв. Чинртә төрмүдиг босхҗ тедниг күцәмҗтәһәр хаһлх кергтәг эмчнр үзүлв, - гиж таӊһчин толһач Хаска Бату инстаграммд бичв.
Энд котельн комплекс углҗ тәвгдсмн, һаза эргндк һазр ахулгдҗ, гемтә улс цевр аһар киилҗ амрхин төлә шишлң бәәр тосхсмн. Ода гемтә улс сарул, цевр-цер хораст бәәхмн, эмнлһиг сән таалд авхмн, үвлин кемд энд дулан, халун цагт серүн болхмн.
Эмнлһнә бүрдәциг ясврин хөөн секлһнә байрт Хальмг Таңһчин эрүл-менд харлһна министрин негдгч дарук Динкин Галина орлцв. Эн байрта өдриг Приютна района әмтн бәәтхә, цуг таңһчин улс теңкән уга күләҗәсмн. Ода диспансер өдгә цага некврлә ирлцдг сән таалта эмнлһн болв.

ДАВАН Наталья

Эмнлһнд сән таал тогтагдв

Видео