Эмнлһсин үүлдвр шинҗлв

12-10-2020, 15:22 | Таңһчин зәңгс » Эрўл-менд харлһн

Одахн Хальмг Таңһчин Улсин Хуралын (Парламентин) депутатнр Аңһра Булган болн Эрднин Арслан пандемийин таалд таңһчин әмтнд медицинск дөң күргҗәх эмнлһсин үүлдвр шинҗлв. Депутатнр таңһчин эмнлһсин ах эмчнрлә харһҗ күүндв, ПЦР-оборудовань хәләв, коронавирус гемтә улсин шинҗллт болн эмнлһ ямр кевәр бүрдәгдсиг хәләв.
Элст балһсна поликлиникин ах эмчин үүл дааҗадг Китан Ольга депутатнрт сoll-төвин тускар келҗ өгв, терүнә телефона тойгар хальдврта гем илдкҗ авлһна шинҗллт кесн улс җиңнүлнә. Т.Хахлынован нертә медколледжин оютнр өдр болһн 200 күүнд хәрү өгч, шинҗллтин аш ямаран болсиг әмтнд медүлнә. Эн төвин үүлдвриг һардҗах Лукшана Аятай болн әмтнәс авсн шинҗллтсиг дигллһнә төриг хаһлдг Моднка Оксана депутатнрин сурврмудт хәрү өгч, көдлмшин диг-дарана тускар келҗ өгв. Балһсна поликлиникин улд ОРВИ гемәр гемтсн улст КТ-шинҗллт келһнә немр кабинет секгдсн бәәнә.
Депутатнр түргн медицинск дөң күрглһнә диспетчермүдин көдлмшлә бас таньлдв. Эднә келсәр, хамгин икәр долан хонгин эклцәр әмтн нааран җиңнүлнә. Ут тоодан нег өдрт хойр зун һар күүнд хәрү өгх кергтә болна. Әмтнәс орҗ ирсн эрлһсиг эдн түргн дөң күрглһнә бригадмудт өгнә, теднәс тавнь шин коронавирусн гемәр гемтсн улст дөң күргнә. Тер мет балһсна поликлиникин дөрвн бригад гертән эмнлһ авчах коронавирус гем илдкгдсн улс тал һарч йовна, дәкәд дөрвн бригад талдан гемәр гемтсн улсиг теткнә.
Бачм медицинск дөң күрглһнә болн аюлын медицинә таңһчин төвд депутатнр бас одв. Тенд эдн түргн дөң күрглһнә шишң көлг хәләв, диспетчерск цергллтин үүлдврлә таньлдв. Одахн Хальмг Таңһчин Толһачин зааврас иштә эн төвин һардачд батлгдсн Хулхачин Киштә түргн дөң күрглһнә цергллтин өдр-бүрин тускар келҗ өгв. Эн жилин йисн сарин эргцд эдн 41 550 дәкҗ дөң күргхәр һарч йовв. Эндр эн цергллтд 16 бригад үүлдҗәнә, теднәснь зурһань коронавирус гемтә улс тал һарч йовна. Наадк арвн бригад талдан эрлһсәр әмтнд медицинск дөң күргнә.
Шишлң медицинск дөң күрглһнә таңһчин төвин ах эмч Татьяна Руденкон һардврт мана таңһчд түрүн госпитальмуд үүлдврән эклсмн. Депутатнр хальдврта гемәс эдгәлһнә госпиталин көдлмшәр соньмсв, эдниг эмәр болн кергтә кергсләр тетклһнә төр яһҗ хаһлгдҗахиг сурв. Татьяна Руденкон темдглсәр, пандемий эклснәс авн хальдврта гемәс хөрлһнд таңһчин бюджетәс баһ биш мөңгн йилһгдв. Эн ахр цагин эргцд йилһгдсн мөңгнә кемҗән урдк җилмүдәс кесг холванд ик болв. Тер мөңгәр медицинск кергсл, тер тоод ИВЛ-аппаратмуд, ПЦР-кергслмүд, кесг дәкҗ олзлгддг саглуллһна кегдлмүд хулдҗ авгдв. Зәрм эм бәәҗ-бәәҗәһәд уга болна, болв иим бәәдл цуг регионмудт тогтсн бәәнә гиҗ Татьяна Анатольевна заав.
- Хальмг Таңһчин Толһач Хаска Батун даалһврар коронавирус гемәр гемтсн улст кергтә эмиг эрүл-менд харлһна министерств хулдҗ авдг болв. Эн кергт таңһчин бюджетәс 42 сай арслң йилһгдв. Урднь батлгдсн бооцаһар 20 сай арслңгар эм хулдж авгдв, эн өдрмүдт талдан чигн эм ирхмн. Тер мет ОРВИ гемәр гемтсн улсин то икдхиг учртан авад Хальмг Ик сурһулин общежитин улд коронавирус гемәр гемтсн улсин төлә госпиталь секгдхмн. Деед Яшкулин санаторн школ-интернатд бас госпиталь секхин төлә көрң бәәнә, – гиҗ харһлтд орлцсн таңһчин эрүл-менд харлһна министрин негдчг дарук Динкин Галина келв.
Одахн хулдҗ авгдсн ПЦР-лабораториг депутатнр В.Манджиеван нертә таңһчин бичкдүдин медицинск төвд хәләв. Эмнлһнә ах эмч Каюка Руслан лабораториг үзүләд, тер үүлдврән эклснәс авн нааран талдан көдләчнр орҗ чадшго гив. Динкин Галинан темдглсәр, хойр шин лабораторь урднь үүлдҗәсн дөрвн лабораторин үүлдвриг ясрулхмн.
Тер өдрин бийднь депутатнр П.Жемчуевин нертә таңһчин эмнлһнд бас одад, эмчнрлә харһҗ күүндв. Таңһчин һоллгч эмнлһнд үүлдҗәх госпитальд хальдврта гемәр гемтсн улс хамгин олар эмнлһ авчана. Энд шинҗллт келһнә әңгд пандемий эклснәс авн көдлмш кесг холванд икдв. Тиигәд, өдрт 70 шинҗллт кехин ормд эдн хальдврта гем илдкҗ авхин төлә 160 күүнә эрүл-мендин бәәдл шинҗлнә. Әңгин һардач Потнян Светланан келсәр, КТ-шинҗллтиг зуг эмчин селвгәр кех кергтә.
Бүртклһнә керг-үүлдврмүдин хөөн таңһчин Улсин Хуралын (Парламентин) депутатнр ухан-тоолврарн хувалцҗ, эрүл-менд харлһна көдләчнрин ач-тус темдглҗ, эдн күнд-күчр таалд үнн кевәр көдлҗәхиг заав. «Эндр бидн мана эмнлһсин үүлдврлә таньлдад, медколледжин оютнр coll-төвд көдлҗәхиг үзвидн. Таңһчин бичкдүдин эмнлһнә улд Хаска Батун даалһврар хулдҗ авгдсн шин ПЦР-лабораторь секгдснь сән, юңгад гихлә бичкдүдт салу шинҗллт кехин төлә таал тогтагдв. Харм төрхд, эрүл-менд харлһна көдләчнр дутчана. Эн төриг бидн таңһчин толһачла болн правительствла хамдан хаһлх арһ хәәхвидн, гиҗ Аңһра Булган келв.
Таңһчин эмнлһст болсн харһлтсиг ашлҗ Эрднин Арслан бас ухан-тоолврарн хувалцв. Депутатын келсәр, эдн эврә нүдәрн цугинь үзәд, хальдврта гемтә улст түргн дөң күрглһнә керг-үүлдврмүд яһҗ күцәгдҗәхиг медв. Эн шин гемәс хөрлһнд күчән негдүлҗ, бидн цуг төрмүдиг хаһлҗ чадхвидн. Таңһчин Улсин Хуралын (Парламентин) депутатнрин нерн деерәс мана эрүл-менд харлһна көдләчнрт, эмнлһсин һардврт ик ханлтан өргҗәнәв, гиҗ Эрднин Арслан товчлв.

ДООҖАН Наталья

Видео