Нүүрлгч төвин эмчнр ирв

12-10-2020, 15:25 | Таңһчин зәңгс » Эрўл-менд харлһн

Давсн долан хонгин чилгчәр мана таңһчур А.Бакулевин нертә зүркнә-судцна хирургийин Келн-улсин медицинск шинҗллтин төвин эмчнр ирсн билә. Мана орн-нутгин нүүрлгч төвин кардиохирургуд П.Жемчуевин нертә таңһчин эмнлһнд зүркнә гемтә улсин эрүл-мендин бәәдл шинҗлв.
- Мана төв җил болһн арвн тавн миңһ һар күүнә эрүл-мендин бәәдл шинҗлнә, тавн миңһн месллһ кенә. Зүркнә гемтә улст цаглань эмнлһ эклхин төлә терапевтнр болн кардиологуд хамцу үүлдх зөвтә. Хальмг Таңһчд зүркнә-судцна гемтә улст сән эмнлһ кенә. Энд коронароангиографий болн стентировань сән чинртәһәр кедгиг темдглх кергтә. Бәәрн эмчнр нарт-делкән некврлә ирлцҗ зүркнә гемтә улст дөң күргнә. Болв зүркнә-судцна зәрм күнд гемәс эдгәлһн зөвәр күнд болна, тегәд бидн дөң-тусан күргхәр ирвидн, – гиҗ медицинск номин доктор, профессор А.Бакулевин нертә медицинск төвин әңгин һардач Владимир Мироненко келв.
Москва балһснас ирсн эмчнр Владимир Мироненкола болн Антон Андреевла мана нег һазра күн Церен Бадмаев гемтә улсиг хәләв. Ут тоодан эдн тәв һар күүнә эрүл-менд шинҗлҗ, гемәс хөрлһнә халхар сүв-селвг өгв. Бәәрн эмчнрин хәләврт бәәдг улс урдаснь йилһҗ авгдв, тедн дунд селән һазрас ирснь чигн билә. Эднд өөдән чинртә эмнлһн керглгдҗәнә, тегәд нүүрлгч медицинск төвин эмчнрин сүв-севлг эднд эркн чинртә болҗана.
Хальмг Таңһчин эрүл-менд харлһна министерствин ах терапевт Октябрина Тягинован келсәр, зүркнә-судцна Келн-улсин төвлә бат залһлдан батлгдсн бәәнә. Цусна селвлтин системин гем шинҗллһнә болн эмнлһнә өдгә цага эв-арһс олзллһиг өөдлүллһнә төлә мана таңһчур нертә медицинск төвин эмчнр ирв. Тер мет мана таңһчин эмчнр төвин улд мергҗлтән өөдлүлнә. Хамцу үүлдвр болн нөкцлт цуг халхарн туста болҗана гиҗ Октябрина Михайловна темдглв.
Өөдән чинртә месллһ келһн зөвәр үнтә болна. Гемтә улст терүг өңгәр кенә, һаруһинь федеральн шаңһ даана. Зәрм тиим месллһн регионмудт кегднә, зәрмснь номин медицинск федеральн төвд давулгдна. Эн ирлһндән А.Бакулевин нертә медицинск төвин эмчнр зүркннә күнд гемтә улсиг йилһҗ авад, Москвад өөдән чинртә месллһ кехәр шиидв.

БАТАН Наталья

Видео