Сурһулин гер шинрүлгдҗәнә

13-10-2020, 17:16 | Таңһчин зәңгс » Сурєуль-эрдм

Көтчнр селәнд Хонин Косиевин нертә гимназь эн җил 50 җилин өөнән темдглҗәнә. Ончта өөниг өргмҗтәһәр темдглхәр зуралгдҗасмн, болв мана җирһлд коронавирус гем учрад, байрин керг-үүлдврмүд хооран саагдв. Дәкәд эн җилмүдин эргцд энд түрүн болҗ бат ясвр кегдҗәнә, тегәд тернь төгсхлә энд эрк биш өөнән байртаһар темдглхмн. Эн сурһулиг төгсәсн сурһульчнрнь нааран гиичд ирҗ, эднд гүн медрл болн чик сурһмҗ өгсн багшнрин ач-тус хәрүлхмн. Ясврин хөөн эднә сурһуль шинрүлгдҗ ке-сәәхн болн өдгә цаган некврлә ирлцдг болснь эдниг өврүлх гиҗ сангдна.
Гимназин директор Җанҗин Эрднин келсәр, ясврин көдлмш «Хальмг Таңһчин сурһуль-эрдмин делгрлт» болн «Хальмг Таңһчин сурһуль-эрдмин бүрдәцст 2016-2025 җилмүдт шин орм тогталһн» гидг региональн көтлврәр кегдҗәнә. Эн кергт таңһчин бюджетәс 29 сай 575 миңһн арслң йилһгдв. Сурһульд тәвн җилин эргцд бат ясвр эс кегдснәс иштә энд кех-күцәх көдлмш аһу ик болҗана. Хөрн җил хооран энд зуг һурвдгч давхрт ясвр кегдсн билә. Ода энд һурвн давхрт, спортивн болн актов залд ясвр кегдв. Энд терз-үүдиг сольв, негдгч болн хойрдгч давхрт бәәдг хораст полыг модар кев, һурвдгч давхрт болхла линолеум делгв. Энд түүмрәс саглуллһна болн әәмшг уга бәәдл тетклһнә төрт ик оньг өгч, электрокүчнә суңһуг сольв, дулаһар, усар тетклһнә болн канализацин турвас шинрүлв. Тосхачнр өдгә цага сән чинртә тосхлтын материалмуд олзлҗ сән таал тогтаҗана.
Батлгдсн бооцаһар ясврин көдлмш үкр сарин чилгч күртл төгсх зөвтә. Тосхачнр көдлмшән батлгдсн цаг-болзгтнь төгсәхәр адһҗана, көдлмшән үнн-чик седклтәһәр күцәхәр шунҗана. Келхд, «Гарант-Строй» ООО Көтчнрә районд Шатта селәнд сойлын Гер тосхсн билә. Дәкәд тосхлтын бүрдәциг һардҗах Атай Катаев энд урднь сурч йовсмн, тегәд төрскн сурһульдан өөнин җилд ясвр кеҗәхнь ик дааврта болҗана.
- Эндр мана гимназьд 536 сурһульч сурчана, цуг халхин багшнр бәәнә. Байн дамшлтта болн өөдән мергҗлттә багшнрла зерглҗ баһчуд көдлҗәнә, цуһар нег-негндән дөңгән күргҗ ниитәһәр үүлднә. Мана гимназин сурһульчнр җил болһн шүүврән өөдән кемҗәнд өгч, орн-нутгин нүүрлгч ах сурһульд сурна. Мана сурһульчнр таңһчин болн Цугәрәсән марһаст, хәләврт гүн медрл үзүлҗ, билг-эрдмәрн чигн нер һарна. Тәвн җилин эргцд энд сурһуль сурч йовсн сурһульчнр дунд отг-әәмгтән, таңһчдан нертә болн тоомсрта улс баһ биш бәәнә. Ода цуһар бидн ясвр төгсхиг теңкән уга күләҗәнәвидн, мана бичкдүд сән таалд улм сәәнәр сурхнь лавта. Эн сурһулин җиләс авн мана гимназьд эклц класст сурдг 213 сурһульч халун хотар өңгәр теткгдҗәнә. Ясврин хөөн хот уудг хорад, спортивн болн актов залд, сурһулин хораст сарул, ке-сәәхн болхнь маднд ик урмд өгхмн, – гиҗ гимназин директор келв.

ДАВАН Наталья


Сурһулин гер шинрүлгдҗәнә
Сурһулин гер шинрүлгдҗәнә
Сурһулин гер шинрүлгдҗәнә

Видео