Госпиталь тосхлһна төр хәләгдв

19-10-2020, 16:05 | Таңһчин зәңгс » Эрўл-менд харлһн

Шидр Хальмг Таңһчин правительствин Ахлач Юрий Зайцевин һардврт болсн селвлцәнд мана таңһчд хальдврта гемәс эдгәлһнә 200 ормта госпиталь тосхлһна төр хәләгдв. Таңһчин һардврин нилчәр Хальмг Таңһч мана орн-нутгин зәрм субъектсин тоод Әрәсәд инфекционн цергллт делгрүллһнә шаңһа көтлврт орв. Тер көтлврин керг-үүлдврмүд күцәлһнд федеральн бюджетәс йилһгдҗәх 16,0 җува арслңгас мана таңһчд 1,8 җува арслң йилһгдхмн.
Дарунь тосхгддг нег давхр стационарн инфекционн госпиталь Элст балһсна дорд үзгт, цергә әңгин өөр, бәәршлхмн. Терүнә тосхлтд 11 аһу гектар һазр йилһгдҗәнә. Тосхлтын көдлмш ирх җилин хойрдгч кварталд экләд, 2021 җилин чилгч күртл төгсхмн гиҗ зуралгдҗана. Госпитальд КТ, УЗИ, рентген болн нань чигн өдгә цага кергсл углҗ тәвгдхмн, энд реанимационн, бөдүн улсин болн бичкдүдин әңгүд үүлдхмн. Хальдврта гемәс эмнлһнә госпиталь онц әәмшгтә биологическ объект болҗ тоолгдна, тегәд усна сурвлҗ тосхлһна төсв күцәлһнд ик оньг өггдхмн. Энд хог-бог эд-бод келһнә болн ус цеврллһнә шишлң көтлвр күцәгдхмн.
Таңһчин йосна бүрдәцс болн хотл Элст балһсна һардврт ахр цагин болзгт газар, усар болн дулаһар тетклһнә бүрдәцсин төлә бәрмт цаасд белдх кергтә. Тер мет төсвин-һаруһин бәрмт цаасиг шинҗллтд орулх, медико-техническ даалһвр кех, тасрха һазрин меҗәг йилһҗ өглһнә болн нань чигн кергтә цаас белдх кергтә болҗана. Тегәд госпиталь тосххин төлә белдврин көдлмш эклсн бәәнә.
Хальдврта гемәс эмндг госпиталь өдгә цага некврлә ирлцдг, сән таалта медицинск бүрдәц болхмн. Энд өөдән чинртә медицинск дөң күргхмн, гиҗ селвлцәнд темдглв.

БАТАН Наталья

Видео