Некврмүдиг күцәх кергтә

20-10-2020, 16:06 | Таңһчин зәңгс » Эрўл-менд харлһн

Хальмг Таңһчин эрүл-менд харлһна министерствин өцклдүрк зәңглсәр коронавирус гемәр гемтсн әмтнә то өдр ирвәс икдәд йовна.
Министр Кикенә Юрийн келсәр, Хальмг Таңһчин эрүл-менд харлһна министерствин то-дигәр мана таңһчд 8131 күн коронавирусар гемтв. Сүл хонгт дәкәд 90 күн эн хальдврта гемәр гемтснь илдкгдв. Өдгә цагт таңһчин госпитальмудт эмнлһ авчах улсин то икдәд бәәнә, сүл то-дигәр ода 763 күн эмнлһ авчана. Эмнлһнд бәәх улс дунд 19 күн күнд бәәдлд туссн бәәнә. Теднәснь 16-нь ИВЛ-аппаратар дөң авчана. Һундл төрхд, эн гемәс көлтә пандемий эклснәс авн 86 күн сәәһән хәәв. Эн гемәр гемтсн улс дунд 3 саата күүкд күн бәәнә, эдн госпитальд эмчнрин хәләврт эмнлһ авчана гиҗ эрүл-менд харлһна министерств зәңглҗәнә. Өцклдүр Деед Яшкулин сурһулин улд деер эдгәҗәх улс орулх дәкәд кедү шин орм һарһад белдсн бәәнә. Тенд цуг кергтә тоот углҗ тәвгдв. Тегәд эдгәх әмтиг тиигәрән йовулхар зуралҗана. Райодар авад хәләхлә иим бәәдл: Яшкулин района эмнлһнә улд үүлдҗәдг госпитальд – 85, Көтчнрә районд – 32, Үстин – 39, Приютна – 22, Ик-Буурла – 15, Сарпан – 27, Хар Һазра – 26, Яшалтан райодт – 27 күн эмнлһ авчана, – гиҗ эрүл-менд харлһна министр Кикенә Юрий зәңглв.
Дааврта һардачин келсәр, кергтә болхла таңһчд үүлдҗәдг госпитальмудт дәкәд шин орм белдх арһ бәәнә. Таңһчин эрүл-менд харлһна көдләчнр, эмчнр, түргн туслмҗин багмуд бачм бәәдлд үүлдҗәнә, эдн кергән даавртаһар күцәҗәнә. Таңһчин Толһачин зәрлгәс иштә хаслһна диг-даран үкр сарин 1 күртл утдулгдсн бәәнә, тегәд санитарн-эпидемиологическ некврмүдиг күцәҗ саг бәәх кергтә.

Манҗин Намру

Видео