Гемиг диилхин төлә күчән негдүлхмн

23-10-2020, 15:42 | Таңһчин зәңгс » Эрўл-менд харлһн

Өцклдүр Хальмг Таңһчин эрүл-менд харлһна министр Кикенә Юрий болн Роспотребнадзорин Хальмг Таңһчар үүлддг заллтын һардач Санҗин Җаңһр олнд зәңгллһнә эв-арһсин көдләчнрлә харһв. Дааврта һардачнр харһлтын йовудт таңһчин эрүл-менд харлһна систем делгрүллһнә, келн-улсин төсвин медлд хаһлгдҗах төрмүдин тускар келҗ өгв. Тер мет мана таңһчд коронавирус гемин туст тогтсн бәәдлин, эрүл-менд харлһна көдләчнр эн күчр цагт ямр кевәр үүлдҗәхин, саглуллһна керг-үүлдврмүд яһҗ күцәгдҗәхин, гриппәс тәрлһнә дааврта кемин тускар бас келгдв.
Таңһчин ах санитарн эмчин келсәр, сүл хонгт дәкәд 97 күн коронавирусар гемтснь илдкгдв. Өцклдүр 71 күн эмнлһ авсна хөөн эдгәд герүрн хәрв. Таңһчин эмнлһсин улд үүлдҗәдг госпитальмудт 793 күн эмнлһнд бәәнә, теднәснь 22 күн күнд кевәр гемнҗәнә. Гемнь күндәр давҗах улсас 17 күн ИВЛ-аппаратд бәәнә. Эн хальдврта гемәс иштә 90 күн насан барв. Таңһчин эмнлһст 1095 орм бүрдәгдсн бәәнә, кергтә болхла дәкәд чигн немр орм секлһнә төр хаһлгдх гиҗ Джангар Николаевич темдглв.
Сурһулин кем эклснәс авн һаха сарас авн 176 сурһульч болн 141 сурһуль-эрдмин халхд көдлҗәх күн эн гемәр гемтв. Таңһчин сурһуль-эрдмин көдләчнрин цуг тооһас 1,2 процентнь болн сурһульчнрин тооһас 0,48 процентнь эн хальдврта гемәр гемтсн бәәнә, тегәд сурһульмудын үүлдвриг зогсах керг уга. Ода сурһульчнр намрин амрлһнд һарсн бәәнә, тегәд терүнә хөөн эдн сурһульдан һархла эпидемиологическ бәәдл ямаран болхнь шинҗлгдхмн.
Харм төрхд, таңһчин бүрдәцст болн предприятьмүдт әмтн нег-негнәсн хальддг йовдл учрна. Тиигәд, зуни кемд 67 бүрдәцд көдләчнр дунд коронавирус илдкгдсн болхла, һаха сард 121 бүрдәцд әмтн гемтснь илдкгддг билә. Тегәд хамгин түрүнд әмтн саглуллһна некврмүд күцәх, чирәдән хааһул өмсҗ, һаран сәәнәр уһах болн эд-бод кех зөвтә.
- Эндр таңһчин эрүл-менд харлһна систем эн әәмшгтә гемәс хөрлһнә кергиг күцәхин төлә арһ-чидлән нөөлго көдлҗәнә. Эмчнр болн дунд медицинск көдләчнр күчр бәәдлд амрл угаһар көдлҗәнә, эдн кесгтән өөрхн элгн-садан үзлго эмнлһст бәәнә. Гемтсн улс дунд 65 наснас ах улс олн бәәнә, тегәд медәтнрин тускар ухалҗ, эднд дөң-тусан күрглһнә буйнч керг-үүлдврмүд бүрдәх кергтә, - гиҗ дааврта һардачнр темдглв.
Зуг олн әмтн күчән негдүлҗ, бийиннь болн өөрән бәәдг улсин тускар ухалхла,эн гем түгшго. Күн болһна даавр керглгдҗәнә. Коронавирус мана җирһлд батрад үлдх хальдврта гем болҗана. Ирх җилд терүнәс тәрлһн эклх, ода болхла саглуллһна некврмүд күцәх кергтә.

ДООҖАН Наталья

Видео