Ачта эмчиг тодлҗ

27-10-2020, 16:03 | Таңһчин зәңгс » Эрўл-менд харлһн

Таңһчин бичкдүдин Манҗин Валентинан нертә медицинск төвд одахн Хальмг Таңһчин ачта эмч, Әрәсән эрүл-менд харлһна йилһән сән көдләч Нимгрә Тамарад нерәдсн санлын самбр секгдв. Тамара Петровна таңһчин бичкдүдин эмнлһнд дөч һар җилдән көдлҗ йовсмн.
Нимгрә Тамара Омск мүҗин Новая деревня гидг селәнд 1948 җилд төрҗ һарсмн. Әәдрхн балһснд А.Луначарскийин нертә мединститут төгсәснә дару эн 1974 җилд таңһчин бичкдүдин эмнлһнд күч-көлснә хаалһан эклв. Таңһчин бичкдүдин эрүл-менд харлһна халхд Тамара Петровна ут тоодан дөчн һурвн җилдән үүлдв. Эн җилмүдин эргцд эн эмч дорас өсч йовх үйин эрүл-менд батруллһнд, олн зүсн гемәс хөрлһнд болн саглуллһнд ик тәвцән орулсн күн болна. Таңһчин бичкдүдин эмнлһнд Нимгрә Тамара гемтә улст түрүн дөң күрглһнә, сурһульд орад уга болн сурчах бичкдүдин әңгүдт көдлв, арвн негн җилдән поликлиникин үүлдвр заллһна халхар ах эмчин дарук билә. Тамара Петровна бичкдүдин эрүл-мендин төв бүрдәлһнә седвәр татсн болн терүг һардҗ йовсн эмч болҗана.
Хамдан көдлҗ йовсн үүрмүднь Тамара Петровнан тускар зуг бүлән үг келҗ, эн цаһан седклтә, үнн хәләцтә, һоодан бәәдг, дааврта, өөрән бәәдг улст дарунь дөңгән күргхдән белн болдг күн билә гиҗ тодлна. Гемтә бичкдүдт эн килмҗән тусхаҗ, күн болһнд эвинь олҗ, бүлән хәләцәрн болн цаһан седкләрн чигн эмндг бәәсмн. Нимгрә Тамара байн дамшлтта болн өөдән мергҗлттә эмч бәәсмн, энүнә һардврт кесг эрүл-менд харлһна көдләч төлҗв, кесгнь эндр таңһчин эмнлһст көдлҗ йовна. Тамара Петровнаг эврәннь багшдан тоолҗах эмчнр болн дунд медицинск көдләчнр баһ биш бәәнә. Цуһар эдн ах үүрән бүләнәр тодлҗ, күч-көлснә хаалһан эклхднь нүдн-амн болснднь ик ханлтан өргҗ ач-тусинь мартшгоһан темдглнә.
Таңһчин эрүл-менд харлһна делгрлтд ик тәвцән орулсн төләдән Нимгрә Тамара өөдән мергҗлттә эмч, күч-көлснә ветеран болсмн. Үнн-чик седклтәһәр үүлдсн төләдән эн Хальмг Таңһчин ачта эмчин болн Әрәсән эрүл-менд харлһна йилһән сән көдләчин нер зүүсмн. Тамара Петровна һурвн җил хооран гемин уршгар сәәһән хәәв. Эн җил элгн-саднаннь, таңһчин эрүл-менд харлһна министерствин болн терүнә медлд үүлддг Олна хүүвин ахлач Болтыра Александрин седвәрәр таңһчин бичкдүдин эмнлһнә эрст Нимгрә Тамаран санлын самбр углҗ тәвгдв. Хамдан көдлҗ йовсн үүрмүднь болн олн пациентнрнь Тамара Петровнан санлыг әрүн кевәр хадһлҗ, кесн ач-тусинь өөдәнәр үнлҗ ханлттаһар тодлна.

ДООҖАН Наталья
ЗУРГТ: Хальмг Таңһчин ачта эмч Нимгрә Тамаран санлын самбр секлһнд орлцачнр

Видео