Хальдврта гемәс саглхар

02-11-2020, 16:18 | Таңһчин зәңгс » Эрўл-менд харлһн

Одахн Хальмг Таңһчин Толһач Хаска Бату Әрәсән Госсоветин коронавирус гемәс хөрлһнә көдлмшч багин селвлцәнд орлцв. Селвлцәг Москва балсһна мэр Сергей Собянин һардҗ давулв. Селекторн залһлдана кевәр болсн селвлцәнд таңһчин правительствин гешүд болн зәрм ведомствсин элчнр орлцв.
Хальмг Таңһчин Толһачин даалһврар таңһчин йосна органмуд коронавирус гемәс хөрлһнә керг-үүлдврмүд күцәнә. Эн хальдврта гемәс хөрлһнә керг-үүлдврмүдиг таңһчин толһач эврәннь бүртклһнд бәрнә. Ода мана таңһчд тавн лабораторь үүлдҗәнә, терүнд нег хонгт 900 шинҗллт кегднә. Таңһчин эмнлһсин улд 15 госпиталь үүлдҗәнә, немр орм бүрдәлһнә төр хаһлгдҗана, гемтә улсиг эмнлһнд, КТ-шинҗллтд оруллһна диг-даран батлгдсн бәәнә, гемтә улс цуг цәәлһвр авхин төлә колл-төв үүлдҗәнә, шинҗллтин ашин туск зәңг СМС-ар йовулгдна, түргн дөң күрглһнә көлгнә то икдҗәнә.
Таңһчин ведомствс хоорндк көдлмшч баг дару-дарунь хулд-гүүлгәнә, халун хотар тетклһнә, олн әмтн цуглрдг объектсар бүртклһнә керг-үүлдврмүд давулна. Әрәсән Роспотребнадзор санитарн-эпидемиологическ некврмүдиг чаңһасн бәәнә. Давсн долан хонгас авн мана орн-нутгт олн әмтн цуглрдг һазрт цуһар эрк биш медицинск хааһул өмсх зөвтә болҗана.

БАТАН Наталья

Видео