Ач-тусинь темдглв

24-11-2020, 15:32 | Таңһчин зәңгс » Сурєуль-эрдм

Шидр Хальмг Таңһчин правительствин Ахлач Юрий Зайцев таңһчин сурһуль-эрдмин болн номин министр Манцан Николайла харһв.
Таңһчин сурһуль-эрдмин болн номин министерств федеральн болн региональн чинртә кесг төсв болн көтлвр бәәдл-җирһлд тохраҗана. Тедн дунд «Сурһуль-эрдм» болн «Демографь» гидг келн-улсин төсвс болна. Теднә медлд «Өдгә цага сурһуль», « Бичкдүдиг асрҗах өрк-бүлмүдт дөң күрглһн», «Баһ наста эрдмчнр» болн талдан региональн төсвс күцәгдҗәнә. Сурһулин төсвс болн көтлврмүд өнчн бичкдүдиг гер-бүүрәр тетклһнд, сурһуль-эрдмин бүрдәцст болн селән һазрт бәәдг сурһульсин спортивн залд капитальн ясвр келһнд, немр сурһуль-эрдмин систем делгрүллһнә керг-үүлдврмүд давуллһнд туслна. Тер мет эн төсвс болн көтлврмүд күцәгдҗәхәс иштә шин федеральн некврмүд орулгдна, сурһульд хойрдгч селгән уга келһнә керг-үүлдврмүд давулгдна, шаңһа аттестац ясрулгдна болн нань чигн чинртә төрмүд хаһлгдна гиҗ харһлтд келгдв.
Энүнә чилгчәр премьер-министр Манцан Николайд Хальмг Таңһчин правительствин Күндллһнә һашг бәрүлҗ өгв. Олн җилдән үнн-чик седклтәһәр көдләд, Хальмгин социальн-экономическ делгрлтд ик тәвцән орулсн төләднь эн ачлвр бәрүлҗ өггдҗәхиг Юрий Викторович темдгләд, сурһуль-эрдмин министерствин үүлдвриг чадмг кевәр бүрдәснднь ханлтан өргв.

Барт белдснь БАТАН Наталья

Видео