Сурһульчнр кесг фестивальд орлцх

04-02-2021, 16:50 | Таңһчин зәңгс » Сурєуль-эрдм

- Хальмг келнә чинринь бидн эврәннь таңһчдан өөдлүләд бәәх зөвтәвидн, олна хург, нәр-наад хальмг келәр бүрдәҗ, терүнд бичкдүдиг болн арвтнриг орлцулх зөвтәвидн.
Хамгин түрүнд балһсна бичкдүд төрскн келндән оньган өгтхә, эдн дунд ээҗин келән меддг күн тату. Тегәд ода орсн үкр җилд таңһчин сурһуль-эрдмин болн номин министерств эн туст ямаран керг-үүлдвр бүрдәх гиҗ медхәр седләв. Ачнр-зеенртәһән терүнд орлцх биләвидн.
МАНҖИН Бадм
Көтчнрә район

Эн сурврт сурһуль-эрдмин болн номин министерствин ах специалист Виктория МУКАБЕНОВА тодрха хәрү өгчәнә:
- Давсн җил амр биш җил болв. Тер бийнь бидн зуралсн тоотан күцәввидн. Зуг керг-үүлдвриннь ик зунь дистанционн эв-арһар давулдг болвидн. Эн җил бас кесг олна нәр-наадн бүрдәгдх.
2021 җилин туула сарин 19-ас авн хөн сарин 31 күртл «Алтн халхц» гидг таӊһчин театральн фестиваль зарлгдҗана.
Фестивальд орлцачнр, таӊһчин сурһульчнрин театральн багмуд хальмг келәр наад бичүләд, видео-зурцан Интернетин аһуд орулҗ тархах йоста. Хөн сарин 31-д батлгдх.
Дәкәд нег олна тааслт олсн таңһчин керг-үүлдврин тоод «Иньгин седкл» гидг хальмг шүлгләнә фестиваль бас онц орм эзлҗәнә.
2021 җилин туула сарин 18-әс авн лу сарин 14 күртл хальмг шүлгчнрин үүдәврмүдәр айст орулҗ дуулдг дууна марһан зарлгдҗана. Фествальд орлцачнр: 1 – 11-ч классмудын сурһульчнр, хальмг ду дуулҗ бичүләд Интернетин аһуд орулҗ тархах йоста.
Фестивалин ашинь лу сарин 14-д батлхар зуралҗанавидн. Эн өдриг юн учр деерәс онц батлсмб гихлә, Әрүн Валентинә өдр гиҗ онц дурлҗ темдглнә. Эн өдр күцәгддг тоот өдгә цагин бәәдлд баһчуд дунд эврә онц авъяст тохрв.
Тер мет шүлг умшдг улсин дунд марһан зарлгдҗана, тернь бас баһчудт, сурһульчнрт болн теднә багшнрт таасгддгнь лавта.
Лу сард хальмг утх-зокъял өргҗүлх күслтәһәр тиим сәәхн марһан болхмн. Хальмг бичәчнрин шүлгүд умшад сурһульчнр хоорндан марһлдх. Марһан ашнь бидн моһа сарин 13-д батлхар зуралҗанавидн.
Цааранднь келхлә «Живая классика» марһанд бас цуг күүкд-көвүд таасҗ орлцна.
Эн җил Басӊга Баатрин 110-ч җилин өөнә байрин кергүдин дунд эн марһан зөвтә орман эзлх.

Видео