Африкин орн-нутгудла нөкцлт делгрҗәнә

Әрәсә Африкин орн-нутгудла нөкцлтән өргҗүлҗ цуг халхар делгрүлхәр седҗәнә. Терүнә тускар Москвад болсн ик хургт Әрәсән Президент Владимир Путин келсн үгдән онц темдглв. Хургт Африкин тивин 48 орн-нутг орлцв. Әрәсә Африкин орн-нутгудын әмтнә җирһлин таал ясрулх саната бәәхән бас медүлв.

Тер ик хургт Б.Б.Городовиковин нертә Хальмг ик сурһулин нарт-делкән үүлдврин заллтын ахлач Ансельм Хундайи орлцв. Харһлтд сурһуль-эрдмин төрмүдт, Африкин төлә кадрмуд белдлһнә кергт ик оньг тусхагдв. Тернь Әрәсән болн Африкин нөкцлтин һол төрнь болхмн. Хальмг ик сурһульд эндр Африкин 26 орн-нутгас 300 оютн сурчана. Сүл 15 җилин эргцд мана ик сурһулиг хол тивин 150 элч төгсәв, эдн эврә орн-нутгудын экономикин кесг халхар көдлҗәнә. Хальмг ик сурһульд сурчасн цаган эдн мартҗахш, Әрәсән болн Африкин орн-нутгудын хоорндк залһлда өргҗүллһнд туслхдан белн бәәнә.
Хальмг ик сурһулин элч кадрмуд белдлһнә, теднд сән медрл өглһнә төрәр болсн күүндврт орлцв. Бат залһлда тогталһна тускар энд келгдв. Ик хургин йовудт Ансельм Хундайи Әрәсән ик сурһулин болн номин Министерствин нарт-делкән хәрлцәнә әңгин толһач Роберт Федеровла харһҗ, Көк теңгсин көвән эргндк бәәдлин төрәр болсн нарт-делкән хургин ашин тускар тодрхаһар келҗ өгв. Тиим харһлтс кесг орн-нутгин номтнрт нөкцлтән цааранднь делгрүлхд, хамцу төсвс белдхд туслна гиҗ эн темдглв. Тиим номин төв туслң Элстд, Хальмг ик сурһулин медлд бүрдәснд ханлтан өргв.
Тер мет Хальмг ик сурһулин элч Мали Республикәс ирсн делегацла харһҗ эн орн-нутгин номин, техникин болн шин эв-арһсин ик сурһулин һардач Диаките Мухамадула харһҗ күүндв. Ансельм Хундайи Хальмг ик сурһулин, энд орс кел болн агробиотехнологий яһҗ дасдгин тускар келҗ өгв. Диаките Мухамадун темдглсәр, Әрәсәлә хәрлцәһән өргҗүллһнә кергт Хальмг ик сурһуль һоллгч орм эзлҗәхнь лавта болв.
«Мана вузин һардвр болн номтнр нарт-делкән нөкцлтиг шунмһадулҗ чинртә төсвс күцәҗ, бат залһлда батрулх саната. Әрәсәд Африкин орн-нутгудла күцәҗәдг нөкцлт делгрҗәнә, орн-нутгин толһач Владимир Путин терүнд ик урмд өгчәнә, мана номтнр чигн тусан күргх саната. Нег үлү эн тивин орн-нутгудла болн вузмудла бидн кесг җилин туршарт нөкцлт делгрүлҗ, мана сурһуль төгсәсн улсла сән залһлда бәрнәвидн. Шин төсвс батруллһнд эдн кезә чигн маднд дөңгән күргнә, тегәд бидн иргчдән номин болн сурһулин хәрлцәһән өргҗүләд бәәхвидн», -гиҗ Хальмг ик сурһулин һардач Салан Бадм келв.
Хальмг ик сурһуль Әрәсән нүүрлгч вузин тоод орҗ, ода нарт-делкән залһлдаһан улм өргҗүлхнь маһд уга гиҗ сангдна.
ТҮРВӘН Һуна