Театрмудын өдгә цага төрмүдин тускар

Сегодня, 13:50 | Общество, Таңһчин зәңгс, Зіњг, Сойл

Басңга Баатрин нертә Келн-улсин театр 90 җилин өөнән темдглҗәнә. Таңһчин әмтнлә эн байриг хувалцхар талдан театрмудын элчнр ирв. Ончта өөнд нерәдсн керг-үүлдврмүдт эдн шунҗ орлцҗана.
Өөнин керг-үүлдврмүдин йовудт «төгрг ширән» сүүр ик соньмслт үүдәв. «Келн-улсин театрин делгрлтин хаалһс. Дамшлтарн хувалцлһн» гиҗ нерәдгдсн сүүрт Әрәсән болн хам-хоша бәәдг һазадын ордудын театрин үүлдәчнр орлцҗ, тоолврарн хувалцв.
Келн-улсин билг-эрдмин коллективсин үүлдәчнр хурц төрмүдәр ил күүндвр тогтав. Келн-улсин үндсни тоотыг хадһллһна, Әрәсән өдгә цага бәәдлд келн-улсин кадрмуд белдлһнә болн хоорндан хәрлцлһнә болн нань чигн төрмүд харһлтд хаһлгдв.
Әрәсән Федерацин билг-эрдмин ачта үүлдәч, Басңга Баатрин нертә Келн-улсин театрин режиссер болн художественн һардач Манҗин Борис өөнин өдрмүдт болҗадг керг-үүлдврмүдин тускар келҗ өгв. Үкр сарин 7-д «Хальмг театр. Режиссермүд» гидг дегтрин презентац болв. Дәкн Борис Наминович «Калмыцкий театр. В студии» болн «Калмыцкий театр. 15 лет» гидг дегтрмүд барлгдхмн гиҗ зәңглв.
Өөнин байрт орлцҗасн гиичнр дунд Хакасин Келн-улсин драмин болн улсин көгҗмин «Читиген» театрин һардач Ирина Чустугешева болн режиссер Каскар Чаптыков, П. В. Кучиякин нертә Алтан Келн-улсин драмин театрин художественн һардач Эмма Иришева, Азербайджана болн Хальмг Таңһчин ачта артист Ильхам Асадов ирсинь темдглхмн. Узбекистана драмин театрин һардач Зульфия Хамраева болн ах режиссер Малика Искандарова, З.Исмагиловин нертә Уфимск билг-эрдмин ик сурһулин һардачин үүл дааҗадг Ильмар Альмухаметов, театрин халхар шалһач болн «Сцена» седкүлин ах редактор Дмитрий Родионов, тер мет Дагестана болн Чувашин театрмудын үүлдәчнр «төгрг ширән» сүүрт орлцв.
Деер заагдсн төрмүдәс нань өдгә цагт драматург улс уга болҗахин тускар келгдв. Өдгә цага төрмүдәр бичгдсн үүдәврмүд уга болад, зәрм театрмуд кезәңк эпическ дуулврмуд олзлҗ наадд тәвнә. Театрт ирҗ көдлх актермудыг, режиссермүдиг болн нань чигн эрдмин мергҗлтнриг белдлһнә төриүдт бас оньг тусхагдв. Баһ наста артистнр кергтә болҗахин тускар, бәәрн һазрт билгтә баһчудыг хәәҗ, теднә чадмгинь һарһҗ үзх таал тогтахин тускар келгдв. Зәңгллһнә өдгә цага эв-арһсин тоотла ирлцҗ үүлдвр ик чинр зүүҗәхин тускар чигн театрин үүлдәчнр тоолврарн хувалцв.
Әрәсән театрин үүлдәчнрин ниицән 150 җилин өөнән темдглхләрн 2035 җил күртл театрмудын делгрлтин зура батлҗ авсмн. Әрәсән олн келн-улсин сойлын зөөр хадһллһн болн «Келн-улсин театрин сурһуль» гидг көтлвр терүнднь һоллгчнь болҗана. Әрәсән Келн-улсин театрмуд терүг орн-нутгин келн-улсин театрмудын ниицәнлә хамдан күцәх зөвтә.
Дмитрий Родионовин темдглсәр, келн-улсин театр өдгә цагт оюни-шагшавдын авъясмудыг олнд медүллһнә эв-арһин негнь болҗана. Театрмуд шинрүллһнә кемд орад, келн-улсин ул-сүүр болдг тоотд оньган өгчәнә, гиҗ эн онц темдглв.
Артистнриг болн нань чигн көдләчнриг белдлһнә төриг театрмуд сурһулин бүрдәцлә бооца батлад, хаһлҗ болхин тускар келгдв. Уфимск билг-эрдмин ик сурһулин элчин келсәр, тиим дамшлтыг эдн олзлна.
Төрскн кел хадһллһн бас хурц төрмүдин негнь болҗана. Наадна дүрмүд тогтасн цагтан эврә келәрн күүндҗ, артист келнд орна. Болв чигн театрт олзлдг эн эв-арһас нань йосна халхар дөң кергтә, сурһульд бичкнәсн авн төрскн кел арднь орҗ дасхад, нань чигн керг-үүлдврмүдиг дигтә-даратаһар күцәхлә эн төр хаһлҗ болхин тускар сүүрт орлцачнр темдглв.
Эдн үүдәгч дамшлтарн хувалцсн деерән театрмудт тәвгдсн төрмүд хаһллһна эв-арһсин тускар чигн тоолврарн хувалцв. Хамгин һол төрнь төрскн келән меддг артистнриг белдлһн болҗана.
ҖИРҺЛИН Кермн

Видео