Тосхлтын халхар шин эв-арһс олзлад

Сегодня, 14:06 | Общество, Таңһчин зәңгс, Зіњг, Сурєуль-эрдм

Ода мана орн-нутгт тосхлтын халхин делгрлтд һол оньг өггдҗәнә. Эрдмин бат медрл авсн, кергән сән чинртәһәр күцәдг инженермүд, тосхачнр, ширдәчнр-шалдачнр кергтә болҗана. Нег үлү мана таңһчд тосхлтын йовуд җил ирвәс өргҗәд йовна, эдлврт орулгдсн гермүдин то җил болһн өсәд йовна. Тегәд чигн Элстин политехникин колледжд тосхтын халхд кергтә мергҗлтнриг белдлһнд һол оньган тусхана.
Энд тосхачнриг, шалдачнр-ширдәчнриг болн тосхлтын нань чигн эрдмтә мергҗлтнриг белднә. Болв ода эн халхд шин кергсл болн эв-арһс өргнәр олзлгдна, тегәд терүг сәәнәр медҗ авч олзлх кергтә. Одахн колледжд Киров балһснас «СМиТ» бүрдәцин мергҗлтнр ирҗ, тосхлтд хамгин шин эв-арһс олзллһна туст дамшлтарн хувалцв.
Бүрдәцин һардач Илья Гомаюнов ширдлһнә шин эв-арһсин болн өдгә цагин кергслин тускар тодрхаһар келҗ өгв. Эднә компань тиим нүүрлгч дамшлтыг тархаҗадг хамгин ик төвмүдин негнь болна, гиҗ Илья Сергеевич темдглв. Политехникин колледжд эдн хойр өдрин эргцд ширдлһнә шин эв-арһ үзүлв, оютнр дамшлтын кичәлд орлцҗ өдгә цага кергсл яһҗ олзлдгинь, тернь көдлмшиг яһҗ түргдүлдгинь медв.
Колледжин һардач Галина Васькина Киров балһснас ирсн күндтә гиичнрт ханлтан өргв. «Регион болһнд тосхачнр болн эн халхин мергҗлтнр кергтә. Тана бүрдәц хамгин шин эв-арһс үзүлҗ ховр эрдмтә баһчудыг белдх арһ өгчәнә. Мана политехникин колледж Әрәсән «Эрдмчнр» төсвд экләд орлцҗана. Колледжин болн таңһчин тосхлтын бүрдәцс хоорнд нөкцлт улм батрх. Бүрдәцс ода сурһулин көтлвр тогталһнд орлцх, мана оютнр эрк биш тосхлтын бүрдәцст дамшлт авх зөвтә, колледжиг төгсәснә хөөн тенд күч-көлснә хаалһан эклҗ көдлх. Тиим кевәр тана сүв-селвг, өдгә цагин эв-арһ олзллһна дамшлт оютнрт болн мана багшнрт ик туста болхнь лавта. Ширдәчин көдлмшиг өдгә цагин кергсл амрдулна, тернь мана оютнриг соньмсулхнь лавта»,- гиҗ Галина Васильевна темдглв.
Деер келгдсәр, Элстин политехникин колледж кесг бүрдәцслә бат залһлда бәрнә, теднә улд дамшлт хоршана. Тосхлтын бүрдәцсин көдләчнр болхла оютнрин белдврин кемҗәһинь сөрҗ теднәс хамгин сәәнинь шүүҗ авч көдлмшт авна. Тиим бүрдәцин негнь Хальмг Таңһчин бат ясврин Заллт болҗана, терүнә һардачин үүл дааҗадг Һәрән Хоңһр бас үг келҗ, өдгә цагт тосхлтын халх ик йовудтаһар делгрҗәнә гиҗ заав. Тер тоод мана таңһчд тосхлтын көдлмшин кемҗән өсәд йовна. Тиим кевәр таңһчд өдгә цагин эв-арһс олзлҗ чаддг баһ наста мергҗлтнр керглгднә. Элстүр ирсн «СМиТ» бүрдәцин элчнр шин кергслин тускар келҗ, терүг олзллһна туст дамшлтарн хувалцҗ, ик туста көдлмш кеҗәнә гиҗ заллтын һардач темдглв.
Колледжин оютнр болн Элстин сурһулин бүрдәцсин сурһульчнр эн харһлтд олар орлцв. Эднд ширдлһнә шин кергсл таасгдв. «Би ширдәч-шалдач болхар седҗәнәв. Тер көдлмш амр биш болдгиг сәәнәр меднәв. Зуг шүүҗ авсн эрдмәр сән дамшлт хоршаҗ авх санатав, колледжин багшнр гүн медрл өгч дөңгән күргх гиҗ санҗанав. Ширдәчнр-шалдачнрин керг ик дааврта болна. Тедн герин бәәдлиг йостаһар хүврәҗ, тенд бәәх улст сән таал тогтана. Ирсн гиичнр ширдәчин көдлмшин шин эв-арһс үзүлв, тиим кергсл удл уга мана Элстин тосхлтын талвңгүдт олзлгдхнь лавта, тегәд ирсн эрдмчнрин дамшлт нанд таасгдв»,- гиҗ колледжин оютн Мукан Валерия келв.
Терүнлә хамдан сурдг Баттөмрин Санҗ бас ирлцңгү тоолврта бәәхән медүлв. Баһчуд тиим шин кергслиг эрк биш олзлхар седх, көдлмшиг түргәр болн сән чинртәһәр күцәҗ болҗана, тернь намаг йостаһар соньмсулв гиҗ оютн келв.
Колледжин һардачин дарук Жанна Сильнееван келсәр, колледжин багшнр дару-дарунь мергҗлтән өөдлүлнә, номин-дамшлтын хургудт орлцна, тенд хоршасн шин медрләрн оютнрла хувалцна. «Эрдмчнр» төсвин йовудт оютнрин мергҗлт өөдлүллһнә керг сән йовудтаһар күцәгдҗәнә гиҗ эн темдглв. Тосхлтын бүрдәцслә бәрдг залһлдаһан өргҗүлҗ колледжин оютнрт өдгә цага медрл өглһнә таалыг ясрулхар энд зуралҗана.
ТҮРВӘН Һуна

Видео