Йилһән сәәнәр сурдг оютнриг ачлв

Эн долан хонгин мигмр өдрлә, үкр сарин 17-д оютна нарт-делкән Өдрлә ирлцүлҗ, Элстд Хальмг ик сурһулин йилһән сәәнәр сурдг оютнрин хург болв. Әрәсән Президентин болн орн-нутгин залврин стипендь авчадг 44 оютн Хальмг Таңһчин Толһачин Ханлтын Бичгәр ачлгдв.
Шидр болхла Хальмг ик сурһулин дәкәд 12 оютн Әрәсән Президентин болн орн-нутгин залврин мөрәһәр ачлгдҗадг байрта зәңг ирв. Тиим кевәр таңһчин ик сурһульд билгтә оютнрин то җил ирвәс өсәд йовна. Эдн цугтан номин шинҗллт күцәҗ, олна көдлмшт чигн шунлттаһар орлцҗ, эврә үүрмүдтән үлгүр болна.
Хальмг Таңһчин залврин Ахлач Босхмҗин Гилән байрин хургт орлцҗ йилһән сәәнәр сурдг цуг оютнриг эднә сән өдрлә йөрәҗ, баһ наста билгтнрт улм ик күцәмҗ дурдв. Таңһчин залврин болн Хальмг ик сурһулин хоорндк хәрлцән батрад йовна, гиҗ Гилән Герасимовна темдглв.
Тер мет Хальмг ик сурһулин һардач Салан Бадм эврә оютнран бас йөрәһәд, тиим оютнр дацң болһнд бәәнә, эдн номин көдлмшт, олна үүлдврт түрүн зергләнд йовхинь темдглв. Эннь эднә багшнрин болн эк-эцкнрин ач-тус болҗана гиҗ келәд, Бадм Катинович Хальмг Таңһчин Толһач Хаска Батуд болн залврин Ахлач Босхмҗин Гиләнд онц ханлтан өргв. Җил болһн таңһчин һардвр номин шин төсвс күцәлһнд дөңгән күргнә, терүнә ашт таңһчин экономикин халхар шин эв-арһс өргнәр олзлгдҗ, кесг төрәр шинҗллт кеҗәдг баһ наста номтнрин үүлдвр делгрҗәнә.
Ведомствсин, дацңгудын болн күрәлңгүдин һардачнр эн хургт орлцҗ, ухан-тоолврарн хувалцв.
Лиҗин Мингиян, хальмг келнә болн дорд үзгин төр шинҗллһнә күрәлңгин һардач:
- Мана күрәлңгин оютнр медрлән гүүдүлҗ йилһән сәәнәр сурхар седнә, теднә төлә мана багшнр цуг таал тогтана. Билгтә оютнр мана бахмҗ болҗана. Эдниг бас нег йөрәҗәнәв, хаалһнь цаһан болҗ, сансн санань күцтхә гиҗ дурдҗанав.
Санчра Элина, оютн:
- Хальмг Таңһчин Толһач Хаска Батуд болн залврин Ахлач Босхмҗин Гиләнд ик ханлтан өргҗәнәв. Эдн оютнрин номин көдлмшин болн сурһулин төлә сән таал тогтаҗана. Эн хург маднд омг үүдәҗ, урмд өгв.
Елизавета Кузнецова, оютн:
Тиим өөдән мөрә авснь бахмҗта болҗана, мана көдлмшиг темдглҗ өөдәнәр үнлв. Шин төсвс күцәҗ, Хальмг ик сурһулин нер дуудулхар зүткх кергтә. Би хол һазрас Хальмг Таңһчд ирҗ сурчанав. Мана оютнр улм ик күцәмҗ бәрҗ олнд үлгүр болтха, цааранднь чигн диилвр бәртхә!
ТҮРВӘН Һуна




















Республиканская газета, издающаяся на калмыцком и русском языках. Газета освещает общественно-политические события, происходящие в Калмыкии, а также публикует материалы по культуре и языку калмыков.