Шин кергсл тустаһар олзлгдҗана

16-02-2021, 14:36 | Таңһчин зәңгс » Эрўл-менд харлһн

«Эрүл-менд харлһн» гидг келн-улсин төсвин медлд П.Жемчуевин нертә таңһчин эмнлһн зүркнә-судцна гемтә улсин төлә шин кергсләр теткгдв. Коронавирусн гем учрснас иштә эн күцц кевәр олзлгдад уга билә. Болв цөөкн өдр хооран гемтә улст стационарн кевәр медицинск дөң күрглһн эклв, тегәд шин кергсл эдлврт орулгдв.
Таңһчин эмнлһнә ах эмч Бадм-Һәрән Очрин келсәр, урднь иим кергсл мана таңһчд уга билә. «Энүг маднд 2019-2020 җилмүдт келн-улсин төсвин болн эмнлһнә реконструкцин халхар авч ирсн билә. Ут тоодан 400 тоотар мадниг теткв. Шин коронавирусн гем учрад, медтехник бүклдән олзлгдад уга билә, болв ода бидн терүг олзта-тустаһар олзлҗ эдлврт орулҗанавидн. Келхд, теднә тоод 800 миңһн арслң күрдг аһу ик чинртә электрическ орн, эксперт классин УЗИ-аппарат, цусна дарлтнь өөдләд инсульт гемәр гемтсн улсин эрүл-менд батруллһна төлә кергтә велоэргометр бәәнә», – гиҗ Очир Владимирович келнә.
Ода 1-ч неврологическ әңгин улд инсульт, инфаркт гемәр гемтсн улсин реабилитацин керг-үүлдвр күцәгдҗәнә. Гемтә улсин цогц-махмудынь батрулҗ, эдниг шинәс йовдг, бийән асрҗ чадхиг дасхна. Шин кергсл иим гемтә улсин эрүл-менд батруллһнд туслна.
Таңһчин эмнлһнә судцна региональн төвин һардач Насуна Светланан темдглсәр, эн кергсл талдан әңгүдт, тер тоод реанимацин болн гемтә улсиг орулҗ авлһна (приемный покой) әңгүдт чигн өргәр олзлгдхмн. Зәрм кергслиг дарунь нег чемоданд цуглулҗ, һартан авч эмнлһнә талдан бәәрнд күнд гемтә пациентд түргн дөң күрглһнд олзлҗ болхмн.
- Эн өдрмүдт бидн күнд гемтә пациентнрт дөңгән күргҗ меслһ кеввидн. Шидр һуч һарсн нег баахн залу күүнә зүркнь шарклад терүг районас нааран авч ирв. Бидн терүнд коронаграфий кеһәд, зүркнә судцнь зөвәр эвдрсиг илдкҗ авсн биләвидн. Тегәд терүнд дарунь чинртә эмнлһ кеснә ашт инфарктас гетлҗ болв. Дәкәд нег күүкд күүнә зүркнь бас шарклад, терүнд шинҗллт кеһәд, Алмазовин нертә Келн-улсин медицинск шинҗллтин төвин эмчнрлә телемедицинә эв-арһар селвлцҗ ховр гем илдкҗ аввидн. Пандемий болҗадг болв чигн зүркнә-судцин гемтә улст түргн дөң күргҗәнәвидн, – гиҗ Насуна Светлана келв.

БАТАН Сәәхлә
ЗУРГТ: зүркнә-судцна төвд меслһ кеҗәх кем

Видео