Көтчнрт хулдачнр марһлдв

25-02-2021, 12:49 | Таңһчин зәңгс » Сойл

Төрскн келнә нарт-делкән өдр угтҗ Көтчнрә районд хулд-гүүлгәнә бүрдәцс дунд «Хальмг келн – мана келн» гидг марһан болв. Хальмг кел делгрүллһнә района хүүвин шиидврәр зарлгдсн марһанд 6 лавк орлцв, терүнәснь һурвнь райпо-н, наадкснь онц эздүдин лавкс болна.

Көтчнрә района муниципальн бүрдәцин администрацин аппаратын һардач Улана Галинан келсәр, лавкст цуг хот-хоолын болн эд-таврин нерднь болн үннь хальмг келәр бичгдв, хулдачнр хулд кехәр ирсн улсла зуг төрскн келәрн күүндв. Тер мет коронавирусн гемәс хөрлһнә диг-даран зарлгдсна ашт санитарн некврмүд бас хальмг келәр бичгдсмн. «Чирәдән хааһул уга орҗ болшго», – гиҗ лавкур орҗ ирсн улст лавкчнр келәд, күн болһна һар эд-бод кеҗ, саглуллһна некврмүд күцәдг бәәсмн.
- Эн марһан района бәәрн улс дунд ик тааслт олҗ, цуһар хоорндан зуг хальмг келәрн күүнддг болв. Дәкәд олн зүсн хот-хоолын, зер-земшин, темснә болн эд-таврин нердиг хальмг келәр дасч авв. Нег үлү дорас өсч йовх баһ үйд эннь төрскн келән дасч авлһнд туста болв. Зәрм арһлачнр хулд кехәр ирсн улсиг урмдулад, Цаһан Сарин йөрәлин марһа давулҗ, эврә лавкиннь нерн деерәс белг бәрүлҗ өгв. Хальмг кел делгрүллһнә района хүүвин шиидврәр иим марһаг зуг төрскн келнә нарт-делкән өдрлә биш, җилд хойр-һурвн дәкҗ давулхар шиидв. Үлгүрнь, таңһчин Өдрлә эс гиҗ олн-әмтнә ниицлтин Өдрлә иим марһа бас бүрдәхин тускар ода ухалҗанавидн. Района цуг бүрдәцсин, предприятьмүдин, хулд-гүүлгәнә, сойлын объектсин нердиг хальмг келәр бичхиг хүүвин гешүд шиидв. Эн өдрмүдт района муниципальн бүрдәцин администрацин әңгүдин нерд хальмг келнд орчулгдхмн. Эн марһан өөдән кемҗәнд давулгдҗ олн-әмтн терүг дөңнснь көтчнрәхн төрскн келндән хару, өвкнриннь авъяс, сойл әрүнәр хадһлхар шунҗахиг дәкәд нег медүлв. Иргчдән эн марһанд района талдан бүрдәцс, предприятьмүд бас орлцхмн, эн сән авъяст тохрхнь маһд уга, – гиҗ Галина Котиновна келв.
Марһана ашар «Шанхай» лавк (арһлач Эрнҗәнә Вера) диилвр бәрв, эднд Аушигерт амрх сертификат бәрүлҗ өггдв. Көтчнрә райпо-н 30-ч тойгта лавкин көдләчнр «Төрскнч седклтә», арһлач Лиҗин Байрта («Баина» лавк) «Төрскн келндән хару», арһлач Таран Светлана «Төрскнч зүрктә» («Төв» гидг лавк) гидг номинацст темдглгдв. Көтчнрә райпо-н 4-ч болн 6-ч лавксин коллективс бас онц мөрәһәр ачлгдв.
ДАВАН Наталья
ЗУРГТ: марһанд диилвр бәрсн арһлач Эрнҗәнә Вера

Видео