Саата күүкд күүнә әм аврв

04-03-2021, 15:31 | Таңһчин зәңгс » Эрўл-менд харлһн

Лу сарин 25-д Манхан Цаһана өрк-бүлд һурвдгч үрнь төрв. Күүкнд Виктория нер өгв. Диилвр гиҗ орчулгддг нер отхн күүкндән өгснь хара биш болв.

Саата Цаһан бер 26-ч долан хонгтан коронавирусн гемәр гемтәд, таңһчин эмнлһнә улд үүлдҗәдг госпитальд тусв. Өдр ирвәс саата күүкд күүнә эрүл-менднь дор унад, гемнь түгәд, чинәнь алдрад бәәв. Энүг реанимацд орулад, өдр-сө уга эрүл-менд харлһна көдләчнрин хәләврт бәәлһв. Харм төрхд, гем ик харшлтан күргснә ашт эн ИВЛ-аппаратар кииһән авдг болв. Госпиталин болн нилхд төрлһнә төвин эмчнр күүкд күүнд дөң күргхин төлә цуг арһ-чидлән олзлв. Москва балһсна Кулаковин нертә номин-шинҗллтин медицинск төвин өөдән мергҗлттә эмчнрлә телемедицинск эв-арһар селвлцҗ, саата күүкд күүнә болн үрнәннь әм аврхин төлә гүн эмнлһ кев. Тиигәд олна күчәр Цаһана эрүл-мендин бәәдлнь батрад, эн эдгв.
О.Шунгаеван нертә нилхд төрлһнә төвин ах эмчин дарук Болан Юлиян келсәр, пандемий эклснәс авн мана таңһчд 254 саата күүкд күн коронавирусн гемәр гемтв. Теднәснь өрәлнь күнд кевәр гемтв, 9 күүкд күн ИВЛ-аппаратд бәәв, тегәд эднд дөң күргхин төлә Кулаковин нертә НМИЦ-ин эмчнрлә телемедицинск консультацс кегдв. Ода деерән 34 күүкд күн цаһан төр болв, экнр болн үрднь эрүл-менд бәәнә. Манхан Цаһан күнд кевәр гемтсн бийнь эдгәд, цаһан төр болв. Келхд, госпиталяс һарсна хөөн эн эмчнрин хәләврт бәәв. Төрҗ һарсн күүкнь 3700 грамм татв, эн эрүл-менд бәәхнь ик байр-бахмҗ үүдәҗәнә гиҗ Юлия Михайловна келв.
Олн үртә эк Манхан Цаһан энүнә болн күүкнәннь әм аврсн эрүл-менд харлһна көдләчнрт, Кулаковин нертә номин-шинҗллтин төвин мергҗлтнрт, таңһчин эрүл-менд харлһна министерствин көдләчнрт ик ханлтан өргҗәнә. Хальдврта гемәр гемтәд, күнд бәәдлд туссн цагт бәәрн эмчнр болн дунд медицинск көдләчнр цуг килмҗән тусхаҗ, бүлән үгәрн чигн омг өгч, дөңгән күргв гиҗ күүкд күн келнә. «Мана таңһчд өөдән мергҗлттә эрүл-менд харлһна көдләчнр бәәнә, эдн цуг арһ-чидлән олзлҗ үнн кевәр эн гемәс хөрлһнд церглҗәнә. Саата күүкд улс эн гем түгҗәх цагт хойр дам саглҗ, эврәннь болн тееҗәх үрнәннь тускар ухалҗ болһамҗта кевәр бәәх зөвтәг би медүв. Тегәд саата күүкд улст саглуллһна некврмүдиг күцәтн гиҗ дуудвр кеҗәнәв», – гиҗ эн темдглв.
– Бидн күүкндән Виктория нер өгвидн. Бидн күүктәһән хамдан эн әәмшгтә болн хальдврта гем диилҗ чадвидн. Энтн мана болн эрүл-менд харлһна көдләчнрин хамцу диилвр болҗана, - гиҗ Цаһан бер келснь басл үнн болв.

ДООҖАН Наталья

Видео