Эрүл-менд харлһна көдләчнриг йөрәв

06-03-2021, 14:56 | Таңһчин зәңгс » Эрўл-менд харлһн

Күүкд улсин нарт-делкән сән өдр угтҗ П.Жемчуевин нертә таңһчин эмнлһнд байрин хург болв. Таңһчин эрүл-менд харлһна делгрлтд ик тәвцән орулҗ, үнн-чик седклтәһәр олн җилдән көдлҗ үүрмүд болн олн әмтн дунд тоомср олсн көдләчнр өөдән ачлврар темдглгдв. Таңһчин эмнлһнә ах эмч Бадм-Һәрән Очр хамдан көдлҗәх үүрмүдтән ханлтан өргҗ, эндрк күнд цагла өөдән мергҗлтән болн байн дамшлтан олзлҗ шин хальдврта гемәс хөрлһнд цуһар арһ-чидлән нөөлго көдлв гив.

- Җилин эргцд бидн хальдврта гемәс хөрлһнә, әмтнә әм аврлһна халхд гүҗрҗ көдлҗәнәвидн. Болв иим амр биш цаг учрв чигн олн җилдән тааста эрмдәрн үүлдҗ хамдан көдлҗәх үүрмүдтән үлгүр-үзмҗ болҗах эмчнрин болн дунд медицинск көдләчнрин ач-тус темдглх кергтә гиҗ санҗанав. Мана эмнлһнд көдлҗәх улс эрдмдән итклтә, көдлмштән дааврта болн үнн кевәр күцәҗәх улс баһ биш. Эндр ачлвр авчах улс дунд һучн-дөчн һар җилдән энд көдлҗәх улс болҗана. Тегәд таңһчин эрүл-менд харлһна делгрлтд тәвцән орулсн ач-туснь маднд бахмҗ болҗана. Нег үлү күүкд улсин сән өдрин өмн өргнд ачлврнь бәрүлҗ өггдҗәхнь хойр дам байрта болҗана, – гиҗ Очр Владимирович темдглв.
Хальмг Таңһчин Толһачин зәрлгәс иштә эмч офтальмолог Нина Опиева болн Виктор Оргаев «Хальмг Таңһчин ачта эмч» гидг нер зүүв. Келхд, Виктор Борисович ода Деед Яшкульд үүлдҗәдг госпиталь һардҗана. Урҗ өдр Целинн района билгтнр тенд көдлҗәх эрүл-менд харлһна көдләчнрин төлә байрин концерт үзүлв.
Байрин хургт эн эмнлһнд олн җилдән көдлҗәх эмчнр Оруса Алевтина, Бедиша Екатерина, Баяна Мария, Бембин Татьяна, Лижин Екатерина, Бембин Любовь, медсестрас Светлана Борцова, Амнина Екатерина,Елена Гладкова болн Дорҗин Вера «Хальмг автономин 100 җилин өөн» гидг медаляр ачлгдв. Өцклдүр үдин хөөн госпитальд көдлҗәх эрүл-менд харлһна көдләчнрин төлә байрин концерт болв.
ДАВАН Наталья

Видео