Төрскн сойлдан эңкр

06-03-2021, 15:04 | Таңһчин зәңгс » Сойл

Һучн җил хооран мана орн-нутгт күүкд улсин ниицән бүрдәгдсн болдг. Мана таңһчд эн олна бүрдәцин региональн әңг арвн хойр җил хооран экләд үүлдҗ, эн җилмүдин эргцд олна бәәдл-җирһлд шунмһаһар орлцҗана. Региональн әңгин ханьд ордг күүкд улс олн зүсн керг-үүлдврин седвәр татҗ, дорас өсч йовх баһ үйд төрскнч сурһмҗ өглһнә, өвкнриннь сойл, авъяс болн кел хадһллһна халхд аһу ик көдлмш күцәҗәнә. СЖР-ин региональн әңгин ахлач Кензән Киштән келсәр, мана таңһчин күүкд улс шунмһа, седвәртә, олн төрәр соньмсдг, билгтә болн үнн хәләцтә, тер төләд эднә дөң-тусар кесг чинртә төр хаһлгдҗана.
- Мана региональн әңгин шунмһа орлцачнр дунд дааврта үүлд көдлдг күүкд улс, сурһуль-эрдмин болн социальн көдләчнр, артистнр, олна үүлдәчнр бәәнә. Тедн дунд Увшин Татьяна зөвтә орман эзлҗ, өвкнриннь сойл делгрүллһнә төрт ик тәвцән орулҗана. Татьяна Акимовна Лагань балһснд һарсмн, бичкнәсн авн тенд көгҗмин сурһульд сурад, домбр цокдг эрдм дассмн. Элстд билг-эрдмин училищ төгсәснә дару эн Бурятьд сойлын академьд сурв. Терүг төгсәснә хөөн төрскн Лагань балһснд бичкдүдин билг-эрдмин сурһульд багшлв. Әәдрхнд чигн эн консерваторьт сурсмн, Хальмг ик сурһульд магистратур төгсәв. Татьяна Акимовна Сергий Радонежскийин нертә Орс келн-улсин гимназьд көгҗмин багшар көдлнә. Дәкәд эн бичкдүдин үүдәлтин Герт «Алтн хоңх» гидг студь һардна. Эн бичкдүдт хальмг домбр цокдг дасхна. Күүкн-көвүн болһнд килмҗән тусхаҗ, эвинь олҗ хальмг улсин сойлар, амн үгин зөөрәр соньмсулна, – гиҗ Киштән Ивановна келв.
Увшин Татьяна хальмг ут дууһар соньмсҗ ода эн төрәр шинҗллтин көдлмш күцәҗәнә. Хуучн хальмг ут дуд цуглулҗ, тедниг хадһллһна халхар эн үүлдҗәнә. Тиигәд, 2019-ч җилд Татьяна Акимовна түрүн болҗ «Харһа сәәхн харнла» гидг дууг нотд буулһв. Эн җилин эклцәр Хальмг Таңһчин ачта артистк Орһан Эрвенан седвәрәр болн Хальмг Таңһчин сойлын министерствин дөңгәр «Ут дун» гидг төсв экләд күцәгдҗәнә. Увшин Татьяна терүнд орлцад, ут ду дуулдг эрдм дасчана. Өвкнриннь сойл, авъяс, авг-бәрц, төрскн кел хадһллһна кергт шунмһа кевәр орлцҗах Увшин Татьяна цуг наадк күүкд улст үлгүр болна.

ДАВАН Наталья

Видео