Мини җирһл

06-03-2021, 15:06 | Таңһчин зәңгс » Сойл

Сүл җилмүдт хальмгар бичдг биш, хальмгар келдг әмтнә тонь баһрад йовна. Эннь маш һундлта йовдл болҗана. Тедү мет хальмг келәр күүнддг, хальмгар ухалдг, хальмгар келвр, шүлг бичдг улсиг альхн деерән бәрәд, эрк биш урмд өгх кергтә гиҗ санҗанавидн. Тиим улсин негнь – Карун Майя. Хальмг Таңһчд Майя Бадмаевнаг эс меддг күн ховр болх. Яһад гихлә һартан өөтә, бәрсән кедг эн күүкд күн мана хальмг өвкнрин сойлан, заң-заңшалан медсн деерән оньдин баһчудт медүләд, үлгүр-үзмҗ болад, даң эврә медрләрн хувалцна. Авъяста күн олн билгтә болдг. Майя Бадмаевнан тускар бас тиигҗ келҗ болна. Бас негн билгнь – шүлг үүдәлһн.Эврәннь шүлгүдән бичхләрн амн үгин үүдәврмүдәс иш авч, терүнә кесг эв-арһ олзлҗана. Үүдәврмүдтән мана зөөр болҗах кезәңк хуучн цецн үг, келц үгмүд, мартдгсн үгмүд орулад, өөрд-моңһлын янз дахад ке даршлһта, эркн чинртә шүлгүд үүдәнә. Тегәд Майя Бадмаевнан бичсн “Мини җирһл” “Тег” хойр шүлгиг тана оньгт тусхаҗанавидн. Халуч, төрскнч күүнә зүркнәс цувлдад төрсн шүлгнь эврәннь умшачнран олад, эднә седкл-зүркиг йосндан авлх гиҗ нәәлҗәнәвидн. Тегәд Майя Бадмаевнаг күүкд улсин сән өдрлә йөрәҗ, цааранднь шүлгүдән нәәрүлтн гиҗ әрүн цаhан седкләсн күсч, амулң-менд сән-сәәхниг дурдҗанавидн.
Мини җирһл
Җирһл, мини җирһлм
Җиңнсн домбрин айста
Җил ирвәс соньн
Җигтә дууһар немгднә.

Байр үүдәсн цагт
Күнд цаган мартхшв.
Седкләр, арһар , чадсар
Нәәҗнрин зовлң хувалцдв.
Күн негәр йовдго
Цагин селгәһәр болдг.
Хатуг – җөөлн иддг,
Цасн дер түүмр шатдг.

Иим соньн улгүр,
Мана өвкнрин зөөриг
Чееҗдән бәрәд йовнав.
Цецн учринь меднәв.
2020-ч җил

Тег
Хәәртә хальмг теегм
Эңкрлҗ чамаг магтҗанав!
Миңһн җилин туршарт
Ке чини хүврәд угал...!

Цевр чини аһарт,
Цецгүдин сәәхн үнрт
Чееҗм мини уудна,
Чирәм чилгрәд одна.

Кеер һарад йовхлам
Кемҗә геедрәд одна.
Санам хурдар гүүһәд
Салькнас шулуһар ниснә...
1996-ч җил
Белдснь Манҗин Намру

Видео