Әрәсән сән гисн архитектормудын тоод

08-04-2021, 17:22 | Таңһчин зәңгс » Сурєуль-эрдм

Приютна района муниципальн бүрдәцин архитектурин, тосхлтын болн ЖКХ-н төрмүдин әңгин һардач Бембин Сарң «Архитектормуд.рф» гидг сурһулин көтлврт орлцад, зун финалистнрин тоод орв. Эн керг-үүлдвр Әрәсән тосхлтын министерствин седвәрәр болн «ДОМ.РФ» акционерн ниицәнә дөңгәр давулгдв. Һурвн девсңгин йовудт һурвн миңһн һар күүнәс орҗ ирсн эрлһәс 50 региона 100 орлцач йилһҗ авгдв.

«Архитектормуд.рф» гиснь мергҗлт өөдлүллһнә көтлвр болна, терүнд архитектурин, тосхлтын болн шаңһа залврин халхд үүлддг Әрәсән мергҗлтнр сурна. Терүнд орлцх зөв авсн улс мана орн-нутгин кесг балһсдт болн һазадын орн-нутгудт нүүрлгч шалһачнрин лекцс соңсхмн, мастер-класст орлцхмн. Тер мет эднә төлә сурһулин экскурсь бүрдәгдхмн. Шидр Москвад болсн түрүн сурһуль төгсв. Эдн җилин эргцд сурад, эрдминнь халхар шин эв-арһсла таньлдҗ хөөннь үүдәсн төсвән эврәннь болн хам-хоша бәәдг регионмудт тохраҗ чадхмн. Эн көтлврт орлцҗах улс дундлад 27-28 күрсн баахн мергҗлтнр болна.
Көтлврт орлцачнрт тавн сурһулин модуль өггдв. Тиигәд, «Социальн объектсин эргндк һазрин делгрлт» гидг модульд селәнә дегтрин саң, сойлын гер, бичкдүдин сад орна. Бембин Сарңгин тоолврар, эн объектс өдгә цага некврлә ирлцҗ тосхгдх зөвтә. Селәнд бәәдг улст, нег үлү баһчудт төрскн һазртан үлдхин төлә өдгә цага болн ке-сәәхн социальн бүрдәцс кергтә.
Эн көтлврт орлцачнрин төлә хойрдгч модуль Әрәсән нег балһснд давулгдхмн, һурвдгчнь онлайн кевәр болхмн. Дөрвдгч модулин сурһуль һазадын орн-нутгт ноха сард бүрдәгдх. Эн җилин чилгчәр Москва балһснд баахн архитектормуд цуглрҗ, мергҗлтән өөдлүллһнә сурһулин ашиг диглхмн.
Ода деерән Бембин Сарң төрскн Хальмг Таңһчдан ямаран төсв тохрахин тускар ухалҗана. Баахн архитекторт мергҗлтән өөдлүллһнә сурһульд орлцҗахнь ик урмд өгч, эрдмин халхар шин медрл хоршаҗ авлһн күцәмҗтәһәр үүлдхд туслх гиҗ ицҗәнә.
БАТАН Наталья

Видео