Заповедникин шүүҗ авсн һурвн мөрә

07-04-2021, 17:03 | Таңһчин зәңгс » Сойл

Хар Һазра заповедникд зерлг аң-аһрусиг йирин йиртмҗин бәәдлд харҗ хадһллһна көдлмш арднь орҗ кегднә. Шидр заповедникин номин көдләчнр белдсн һурвн төсв мөрә шүүҗ авв.

Грантмудын хәләврин комиссьт 91 төсв орсмн, теднәс 13-нь дөңнгдв. Теегин һәрд шовуна төлә бәәршх үүринь ясҗ белдлһнә төр тәвсн, терүг яһҗ күцәхиг тодрха кевәр цәәлһсн «Сарпинский» федеральн заповедникин ул деер делгрүлгдх төсв мөрә авв. «Ховр аһрусдыг хадһллһн» гидг номинацд эн төсвиг дөңнв.
Көк теңгсин көвән ар-деед үзгт гөрәсдиг харҗ хадһллһна төрт нерәдгдсн төсв бас мөрә шүүв. Цуг делкән аӊхун йиртмҗин саңгин дөңнлт олсн грантмудын мөңгәр шинҗллтд болн көдлмшт туслх өдгә цага кергсл хулдҗ авгдхмн, теегт көдлмш кеҗәх әмтнә мергҗлтинь өөдлүллһнд олзлгдхмн.
Заповедникин номин көдләч Абушин Антон белдсн төсв чигн мөрә шүүҗ авв. «Хальмг Таңһчд теегин һәрд шовудыг харҗ шинҗллһн» гидг төрәр белдгдсн төсвиг Великобританя Руффордын саң (Rufford Small Grants for Nature Conservation) дөңнсмн.
Таңһчин теегин аһуд бәәршдг ховр аң-аһрусдыг болн шовудыг харсҗ, тооһинь өскҗ хадһллһнд Хар Һазра заповедникин белдсн төсвс залгдҗана. Эднә седвәртә үүлдвр иигҗ дөңнгдҗәхнь йир сән йовдл болҗана.
ҖИРҺЛИН Кермн

Видео