Орс гимназьд клуб секгдв

13-04-2021, 16:41 | Таңһчин зәңгс » Сурєуль-эрдм

Шидр Элст балһсна Администрацин Толһач Дмитрий Трапезников Сергий Радонежскийин нертә Орс гимназьд одв. Дмитрий Викторович гимназин хорас хәләв, техническ тетквриг шинҗлв. Сергий Радонежскийин болн олн-әмтнә сойлын музейин үүлдврлә таньлдв. Сән авъяст тохрсар күндтә гиич гимназин багшнрт болн сурһульчнрт нерәдҗ шишлң альбомд йөрәлин үг бичв.

Гимназьд «Точка роста» гидг сурһулин төв үүлдҗәнә, коворкингин хора бәәнә, тегәд Дмитрий Трапезников тенд сурһульчнрин төлә ямаран таал тогтагдсиг хәләв. Сурһулин бүрдәцд күүкд-көвүдт төрскнч сурһмҗ өглһнд ик оньг өггднә, сурһульчнрин билг-эрдм делгрүллһн өөдән кемҗәнд бүрдәгдсмн. Гимназин хазгудын класст сурдг бичкдүд Диилврин Өдрт нерәдгдсн байрин керг-үүлдврмүдт орлцх төрәр балһсна администрацин толһач сурһулин бүрдәцин һардврла күүндв.
Бичкдүд хаалһин җисәнә зокал сәәнәр медхд, әәмшг уга бәәдлин туст гүн медрл авхин төлә хаалһд әәмшг уга бәәлһнә булң секгдв. Күүкд-көвүд энд хаалһд бийән чикәр бәрлһнә медрл хоршадг болхмн. Хотл балһсна администрацин толһач терүг байрин бәәдлд секәд, улан тасм керчв. Дмитрий Трапезниковин келсәр, удл уга Элстд электронн самокат нәәмәдллһнд авлһна пунктс секгдхмн, тегәд хаалһд әәмшг уга бәәлһнә медрл бичкдүдт туста болхмн.
Тер мет Дмитрий Трапезников энд «Стрелок-08» гидг спортивн-халһна клуб секлһнд орлцв. Терүнд бичкдүд пневматическ бууһар хадг дасдг болхмн. Хальмгин дамшлтан халһна федерацин седвәрәр клуб секгдв. Халһна спортар соньмссн бичкдүд чаңһ-чиирг болсн деерән, чик авг-бәрцтә болҗ өсх гиҗ күндтә гиич темдглв.
Ода клубд орлцачнр пневматическ пистулар хадг дасчана, өөрхн иргчдән эднә төлә винтовк болн карабин хулдҗ авгдхмн гиҗ зуралгдҗана. Уйн наста спортсменмүд Сарпулин крайд болх марһанд белдвр кеҗәнә. Намртан эдн баh наста орлцачнрин Цугәрәсән марһанд йовхар бәәнә. Тегәд сән белдвр кеҗ, терүнд эрк биш дииләчнрин тоод эдн орхар зүткҗәнә.
БАТАН Сәәхлә

Видео