Эгл улсин зөргтә үүлдвр

17-04-2021, 16:25 | Таңһчин зәңгс » Сойл

«Зөргтә үүлдвр» гидг Цугәрәсән кемҗәнд һардг төсвин «Эгл улсин зун зөргтә үүлдвр» нерәдлһтә хойрдгч боть барас һарв.

Әмтиг харсҗ, зөргтә эс гиҗ буйнч седклин үүлдвр күцәсн эгл улсин тускар эн дегтрт келгдҗәнә. Ямр нег халхар әмтнд тусан күргсн зун тууҗла энд таньлдҗ болхмн. Хальмг кɵвүн Байра Мергнǝ тускар нег тууҗднь келгдҗәнә. 2013-ч җилин үкр сарин 29-д сɵɵhǝр Хальмгин нег хаалһд әәмшгтә йовдл учрв. Хойр машин нүүрцҗ харһад цокгдв. Хажуһарнь йовсн Мергн үүрмүдтәһән машинд һал орҗахинь, машина ардк сандлд күүкд күн бәәхинь үзв. Түдл уга Мергн терүг харсҗ авхар машин тал адһв. Падрҗ шачах һалас күүкиг тер дарунь һарһҗ чадсн уга. Тер бийнь көвүн цуг чидлән агсад, күүкиг харсад, тенд йовсн дәкәд нег күүнд нөкд болв. Һалас һархар ноолдҗасн кемлә харсачнр болн түргн дөң болдг машид ирәд, Мергн харсҗ авсн әмтиг авад йовҗ одв.
Күүнә әм аврсн зөргтә эн йовдлын тускар тер дарунь күн медсн уга. Зуг хаалһар тер өдр йовад, зеткртә йовдлыг үзәд, зургинь цокад, социальн гɵлмд терүгинь үзүлснә хөөн «Зөргтә йовдл» гидг төсв белддг әмтн үзәд, тодрхаһар медҗ авад, дегтртән орулв. Тавн миңһн тиражтаһар һарсн дегтрт иигәд зөргтә хальмгин әм авргч үүлдврин тускар келгдҗәнә.
Соньн эн төсвиг Саранск балһснд бәәдг седклтә болн седвәртә әмтн нәәмн җил хооран ухалҗ кедг болв. Ода эгл улсин зөргтә болн буйнч үүлдврин туск дегтр ик тааслт олад, делкән кемҗәнд һарв. Дегтр белдлһнд Әрәсән, Белоруссин, Украина, Германя, Канадын седкүлчнр, зурачнр орлцҗ, мөңгн угаһар белдҗ барллһна көдлмшиг кенә.
ҖИРҺЛИН Кермн

Видео