Карелин театр Хальмгт ирҗәнә

20-04-2021, 15:55 | Таңһчин зәңгс » Сойл

«Ик гастрольмуд» гидг федеральн төсвин кемҗәнд Карель Республикин театр Хальмг Таңһчд ирҗәнә. Әрәсән ар үзгәс ирҗәх театр һурвн наад үзүлхмн. Гастрольмуд мɵрн сарин 22-ас авн 24 күртл болхмн. Басңга Баатрин нертә Келн-улсин театрин тәәз деер һурвн ɵдртән карельск артистнр билгән үзүлх мөн.
В. Гуркина «Кадриль», А. Вампиловин «Дом окнами в поле», Д. Новиковин «Голомяное пламя» гидг hурвн наад элстихн болн хотл балһсна гиичнр хәләҗ чадхмн.
«Голомяное пламя» гидг Д. Новиковин романар драматург Ольга Погодина - Кузмина пьес бичсмн. Тер үгәрнь Карелин театр тәвсн наадн Элстд мɵрн сарин 22-т үзүлгдхмн. Нааднд үзүлгдҗәх йовдлмуд өдгә цагиг давсн тууҗла негдүлҗ, кезәнә болсиг сергәҗ, әдлцүлҗ үзүлҗәнә. Һол дүрнь болҗах өдгә цага баһ наста күн Григорийин җирһлд учрҗах йовдлмуд кесг зун җил хооран бәәсн әрүн күн Варлаам Керетскин һашута хөв-кишглә залһлдулҗ үзүлгдҗәнә. Әрүн эн күн ик үүл татад, тер үүл һарһсндан басл ик зовлңта цааҗла бийән харһулсинь әмтн тууҗас меднә. «Голомяное пламя» гисн иләр шачах һалын бәәдл, Цаһан теңгсин деегүр һардг доһлң эмгнә сәәхн һалын герл гиҗ тәәлгднә. Чик седклтәһәр бәәнә гисн ямаран болдгиг нааднд үзүлгдҗәнә. Нааднд һол дүрнь болҗах Григорий җирһлиннь учр-утхиг медҗ авхар ар үзгүр йовна. Тер йовлһн Цаһан теңгсин көвәһәр бәәсн кезәнк әмтнә тууҗла таньлдх, теднә амр биш җирһлиг медҗ авхд туслна. Тегәд наадна үүлдвр негт 16 зун җилд, хойрдад, давсн зун җилин 20-ч җилмүдт, эс гиҗ тер зун җилин чилгчд болснь үзүлгднә, дарунь үүлдвр өдгә цагур дәкнәс эргҗ ирнә.
Наад тәвсн режиссер, Карелин билг-эрдмин ачта үүлдәч Андрей Дежоновин келсәр, тууҗин йовдлмудыг сергәлһн, мартгдсн ул-сүүриг шинәс батлҗ авлһн, өвкнрин күцәсн ончта тоотыг өсч йовх баһчудт медүллһн – энтн келн-әмтн болһна иргч керг болҗана. Бичәч Д. Новиковин эн тоолвриг дөңнәд, наадыг режиссер тәвв. Һол тер тоолвриг олн хәләһәчнрт медүлх санаһан Андрей Дежонов наадарн медүлҗәнә.
Романа түүрвәч Д. Новиков Карелин бичәчнрин Ниицәг толһална. «Голомяное пламя» гидг роман 2017-ч җилд «Русский буккер» гидг Әрәсән тоомсрта гисн утх-зокъялын мөрә авх бичәчнрин тоод орсн билә. 2019-ч җилд эн роман Ф. Абрамовин нертә утх-зокъялын мөрә «Өдгә цага түүклән» гидг номинацд авв.
Дарани наадн – шог наадн «Кадриль». Эн нааднд өдгә цага бәәдлд җирһлин хаалһин ик зууһинь авчксн әмтн яһҗ бәәхинь үзүлҗәнә. «Эднә цагнь давҗ» гиҗ келҗ болхмн. Карелин ачта артистнр Алексей Белов, Ольга Портретова, Тамара Воронова, Олеся Леонтьева, артист Андрей Горшков бүрдәҗәх дүрмүд олн зүсн бәәдлд тусад, уульх, инәх, кен-негндән дурго болх, нань чигн соньн бәәдлд тусна. Күүнә ухан-седклд болҗах хүврлтс өөр эргндк йиртмҗиг бузрдхлһна йовдлла залһлдата болҗахиг реҗиссер, Карелин ачта артист Вячеслав Поляков болн артистнр наадарн медүлҗ чадна. Наадыг мɵрн сарин 24-д хәләҗ болхмн.
Драматург А. Вампиловин нериг Әрәсәд әмтн сәәнәр меднә. «Дом окнами в поле» гидг наадн вепск келәр тәвгдҗәнә. Вепсмүд гисн финн-угорск келтнрин тоод ордг баһ келн-улс болдмн. Эдн Карелин, Вологодск болн Ленинградск муҗсин һазрт кезәнәс авн бәәнә.
Наадна һол дүриг тогтаҗах баһ наста багш һурвн җилдән селәнд көдләд, хәрү балһснур һархар бәәнә. Сурһульчнрла, багшнрла, эк-эцкнрлә мендән медлцәд һарчкад, эн баахн залу генткн Лидия күүкд күүнә герт одна. Тендән зөвәр удан цаг болад, залу уга гергнә герт тиим удсндан зөвәр нәрн бәәдлд тусна. Эн өвәрц бәәдлин өөр цуг үүлдвриг режиссер Карелин ачта артистк Снежана Савельева тогтаҗ чадв. Залу гергн хоорндк хәрлцәнә дөңгәр вепск селәнә бәәдл үзүлсн деерән режиссер көгҗмин янз нааднд орулв.
Филологическ номин доктор Н. Зайцева вепск келнд наад орчулв. Номт наадыг театрин төлә сексн деерән А. Вампилов болн вепск сойл хоорнд залһлдан бәәхиг илдкҗ үзүлв. А. Вампилов Иркутск муҗин Кутулик района цутхлңд төрсмн. Урднь тенд вепсмүд бәәҗ. Тиим соньн наадыг Хальмгин хәләһәчнр мɵрн сарин 23-д хәләҗ чадҗана. Иигәд Карелин театр Хальмгт янзарн әдл биш һурвн наад авч ирҗәнә. Әрәсән аһу ик һазрт бәәх талдан келн-улсин билг-эрдмлǝ таньлдх арһ эн гастрольмуд өгчәнә.
ҖИРҺЛИН Кермн

Видео