Осетин әмтн болн цагин бәәдл

20-04-2021, 15:58 | Таңһчин зәңгс » Сойл

Эн сарин эклцәр Хальмгин зурачнрин һәәхүл Ар Осеть-Алания Республикд секгдсн билә. Ода осетинск зурачнрин һәәхүл Элстд Н. Пальмовин нертә Келн-улсин музейд секгдв.
«Осетинский колорит» гиҗ нерәдгдсн һәәхүл ирсн улст икәр таасгдв. Дүрслгч билг-эрдмин олн-зүсн янзар үүдәгдсн зургуд болн скульптурмуд осетин улсин эндрк бәәдл-җирһллә, эдниг үүмүлҗәх төрмүдлә таньлдулв. Энд тәвн зурачин 100 һар үүдәвр тәвгдҗ, әмтнә оньгт тусхагдҗана.
Һәәхүлд ирсн әмтн Ф. Цаллагован акварельн нәрн үүдәврмүдиг, Ю. Побережный зурсн графическ көдлмшиг таасҗ хәләв. Скульптормуд Ю. Кцоев болн В. Мхитарян кевлсн скульптурмудын өөр баһчуд соньмсҗ зогсҗахнь үзгдв. Зурачнр З. Битиеван болн А. Абаевин зургуд ширин соньн нииврәрн әмтнә оньг тусхаҗав. Соньн нег янзин тускар келлго бәәҗ болшго. Энд эмальд зургдсн үүдәврмүд кецү өврмҗтә болҗ медгдв. Тедниг зурач Л. Байцаева зурсмн. Иигәд күн болһн эн һәәхүлд соньмсулсн нег зургиг олснь цуглрсн улсиг һәәхҗәһәд медгдәд бәәв.
Соньн һәәхүлиг Хальмг Таңһчин Толһачин селвгч В. Салынов йөрәлин үг келҗ секв. Таңһчин сойлын болн зуульчллһна министрин дарук Лариса Летуева иим һәәхүлмүд келн-әмтнә билг-эрдмлә таньлдулсн деерән улсин хоорндк залһлдаг батллһнд туслдгинь темдгләд, министерствин йөрәлин бичгиг гиичнрт бәрүлҗ өгв. Әрәсән Федерацин ачта зурач, Әрәсән художествин академин гешүн-корреспондент Олег Басаев осетинск үүдәгч делегацин нерн деерәс Хальмгт иим бүләнәр тосҗ авад, һәәхүлиг сән кевәр бүрдәснд ик ханлтан өргв. Мөрн сарин эклцәр хальмгуд Осетьд ирәд, сойлын ик байр бүрдәснә тускар эн келв. Зурачнрин һәәхүллә зергднь билг-эрдмән үзүлсинь әмтн икәр таассиг эн темдглв. Бииһин туст басл сән эрдмтә болдг осетинмүд «Өөрднр» бииһин театрин үүлдвриг өврмҗтә, өөдән билгтә болн седвәртә, иргчүр зүтксн бииһин эрдм гиҗ үнлв. Данара Шалхановаг болн Мерген Кимиг Осетьд йирин сән меднә, эднә билгиг өөдән үнлнә.
Иигәд сойлын халхар залһлдаһан батллһн хойр келн-әмтнд йир кергтә. Осетин зурачнрин Ниицәнд 200 һар күн орна. Тегәд энд авч ирсн зургуд мана үүлдврин зуг нег бичкн әңгнь болҗана.
Хальмгин зурачнрин Ниицәнә ахлач Виктор Дорджиевин үгәр зурачнр, сойлын үүлдәчнр хоорндан йовлцад, дамшлтарн хувалцад, кен-негнәсн соньн тоотыг дасад, бүклдән билг-эрдмин делгрлтд сән йовуд өгхнь лавта.
Александр Поваев, Виктор Терехов, Виктор Ургадулов, Руслан Тимошенко, Галина Ушанова, Степан Ботиев, Мергн Мошулдаев болн Хальмгин нань чигн зурачнр һәәхүлин зургудла таньлдҗ, осетинск зурачнрла харһҗ күүндв.
Осетяс ирсн гиичнрт музейин залмудар экскурьс кегдв, таңһчин оркестрин концертиг гиичнр хәләв.
Келн-улсин музейин зун җилин өөнин кемҗәнд кегдҗәх һәәхүл әмтн дунд ик соньмслт олҗана. «Бамб цецг» академическ ду-бииһин ансамблин көгҗмин оркестр һәәхүлиг секлһнд орлцҗ, хальмг көгҗм татҗ, ирсн улст сергмҗ үүдәв. Соньн эн һәәхүл хөн сарин 10 күртл көдлхмн.
Галина ХЕЙЧИЕВА

Видео